Հայաստանի Հանրապետության Կառավարություն

«Ժամանակը» փոխանցել է ՀՀ նախկին վարչապետ Հրանտ Բագրատյանի տեսակետը, թե «Հայաստանի՝ օրեցօր վատթարացող տնտեսական վիճակից դուրս գալու» ճանապարհը ՀԱԿ-ի հրապարակած «100 քայլ» ծրագրի իրականացումն է, նաև դրամի դենոմինացիայի մասին կարծիք-առաջարկը, ըստ որի բանկերը հնարավորություն կունենան «նորմալ փակել իրենց բալանսները» և կկրճատվի ստվերը։ «Առավոտը» անդրադարձել է երեկ լրագրողների հետ հանդիպման ժամանակ տնտեսության ներկա վիճակի մասին ԱԺ պատգամավոր Գագիկ Մինասյանի տեսակետներին, մասնավորապես մինչև տարեվերջ տնտեսական աճի կանխատեսմանը («կունենանք ոչ թե տոկոսներով, այլ անգամներով աճ») և հարցրել՝ «Էլի վագրային թռիչքներ»։ Մի այլ հրապարակման մեջ թերթը նախ նշել է, որ «Հարավկովկասյան երկաթուղի» ընկերության բյուջեն այս տարի մեծացել է, ապա, իր հանգույն ներկայացնելով կազմակերպության «աշխատանքային մանրամասները», դարձյալ հարց առաջադրել՝ «ամենամյա խարդախությունների շնորհի՞վ»։
«Կապիտալը» երկու հրապարակումներում գրել է, որ «տասներկուամսյա գնաճը կարող է կազմել 9.6%» կամ «4%-ով ավելի գնաճի նպատակային ցուցանիշի վերջին շեմից», իր հերթին Հայաստանում ճգնաժամի արդյունքում շինարարությունը «տնտեսության շոգեքարշի դերը զիջել է ծառայությունների ոլորտին», արդյունաբերության բնագավառում էլ դրական փոփոխություններ տեղի են ունեցել միայն հանքարդյունաբերության ասպարեզում։
«Գնաճն ահագնանում է, դրամը՝ ուժեղանում» և «այլ ելք կենտրոնական բանկը չի տեսնում,-մտահոգվել է «Հայոց աշխարհը» և հանգել եզրակացության, որ առաջիկայում «դոլարի լողը» կախված կլինի այն գնաճային իրավիճակից, որի մեջ հայտնվել է երկիրը։
«Առավոտը» գրել է, թե կառավարությունը, իսկ նրա հետ նաև «գյուղնախարարությունը, դեմքով դեպի գյուղատնտեսությունը շրջվելու փոխարեն, հետույքով է շրջվել» և «շշմելու բան» համարել, որ «Ազատություն» ռադիոկայանի թղթակիցը ոչ թե ՀՀ կառավարությանը կամ գյուղնախարարին, այլ գործարար Սամվել Ալեքսանյանին է դիմել ու փորձել տեղեկանալ, թե հացի ինչպիսի պաշարներ ունի երկիրը», ինչպես նաև հացի թանկացման հետ կապված՝ «բնակչությանն սպասվող դժվարությունները»։ «Կապիտալի» հետ զրույցում ֆինանսական համակարգի հաշտարար Փիրուզ Սարգսյանը նախ նշել է, որ ֆինանսական կազմակերպությունները շահագրգռված են, որ հաշտարարի ինստիտուտը կայանա, ապա հավելել, որ «գրեթե բոլոր գործերը լուծվում են հաշտությամբ» և «հօգուտ հաճախորդի»։