Հայաստանի Հանրապետության Կառավարություն

Էլեկտրոնային լրատվամիջոցների նախորդ երկու-երեք օրվա և տպագիր մամուլի այսօրվա մի շարք հրապարակումներ շեշտում են Դիլիջանում տեղի ունեցած միջազգային համաժողովի նշանակալիությունը` «Ծրագրերի լավագույն պորտֆելը Հայաստանում է» («Հայաստանի Հանրապետություն»), «Ապագան պետք է տեսանելի լինի» («Գոլոս Արմենիի»), «Հույժ գաղտնի քննարկում. ինչպե՞ս Վենեսուելայի փորձը բերել Հայաստան» («Կապիտալ». ի դեպ, թերթը տարակուսում է, թե «սոցիալիստական Վենեսուելայի ո՞ր հաջողությունը նկատի ունի ֆինանսների նախարարը, երբ ասում է` այդ երկրները զարգացած տնտեսություններ են»): Համաժողովի համատեքստում վերլուծելով մեր երկրի տնտեսությունը, «Իրավունքը» արձանագրում է, որ «մոտ 35 տոկոսով հեռու ենք 2008-ի մակարդակից»: Հետևությունը, ըստ թերթի, մեկն է` «Կրիայի քայլերով հեռուն չես գնա»: «Հայկական ժամանակը» դրական է համարում այն, որ ՀՀ վարչապետը համաժողովում խոսել է արտահանման «ամենևին ոչ աճի, այլ աճի խթանման անհրաժեշտության մասին: Բայց շատ վատ է, որ միայն խոսում են»: Հոդվածագիրն այնուհետև անդրադառնում է խնդրի «գեղարվեստական» կողմին` հընթացս թվարկելով օտարերկրյա հյուրերի անունները: Նրանցից պրոֆեսոր Հաուսմանի անունը հատուկ է առանձնացնում «168 ժամը», քանի որ այդ գիտնականը մինչ այդ դասախոսությամբ էր հանդես եկել Հայաստանի ամերիկյան համալսարանում: Թղթակիցը զարմանում է. «Արժե՞ր արդյոք տարիքն առած ու զբաղված մարդուն բերել-հասցնել Հայաստան, որ նա ասի մի բան, ինչը արդեն մեկ տարի շարունակ կրկնում է վարչապետ Տիգրան Սարգսյանը»:
«Գոլոս Արմենիին» դժվարանում է տրամաբանական համարել սոցիալական պաշտպանության ոլորտում ՀՀ կառավարության քայլերը. «Չնայած գազը թանկացել է 37 տոկոսով, իսկ կարտոֆիլը` 300», փոխհատուցում է արվում միայն գազի պարագայում: Այս թերթին չի գոհացնում նաև կառավարության քաղաքականությունը տեղեկատվական տեխնոլոգիաների ոլորտում. «Պետությունը նմանակում է կառավարումը»: Հաջորդ հոդվածում «Գոլոսը» տրամաբանական չի համարում նաև ԱԺ դահլիճի «գլոբալ» նորոգումը, քանի որ «ամենադաժան տնտեսական ճգնաժամի եռուն շրջանում իշխանությունը որոշել է, որ խորհրդարանը պետք է գեղեցիկ լինի, և գեղեցկության համար տնտեսելու կարիք չկա»:
«Հայոց աշխարհը», հակիրճ ներկայացնելով ՀԴՄ կտրոնների խաղարկության հայրենական ամբողջ «հերոսապատումը», գտնում է, որ այն չի արդարացրել իրեն, և առաջարկում է «մտածել այլ տարբերակների մասին, քանի դեռ գաղափարն ամբողջապես չի վարկաբեկվել»:
ՌԴ քաղաքացին բաց նամակ է հղել ՀՀ նախագահին` խնդրելով կանխել ՀՀ տարածքում ներդրում կատարելու իր և իր գործընկերների նախաձեռնությունը ձախողելու փորձերը: «Առավոտի» կարծիքով նամակը «կարող է դիտվել իբրև հաղորդում հանցագործության մասին»:
«Առավոտի» թղթակիցը, անցած կիրակի Ստամբուլի օդանավակայանում ենթարկվելով թուրքական իշխանության ցուցաբերած քսենոֆոբիային, նույնպես հանգել է այն եզրակացության, որ նրանք «Եվրոպայից դեռ շատ հեռու են»: