ուրբաթ, 17 սեպտեմբերի 2010
Մերձավոր և հեռավոր ապագա
«Իրատես դե ֆակտոն» «շատ մեսիջներ» է ստացել Դիլիջանի տնտեսական համաժողովից: Նախ, այնտեղ «ցուցանվում էր` որքան մեծ է Տիգրան Սարգսյանի սատարման դիապազոնը դրսում»: Մյուս մեսիջները, ըստ հոդվածագրի, տրվել են համաժողովին հաջորդած խնջույքի ժամանակ, երբ բաժակ է բարձրացվել հանուն ՀՀԿ ներկայի և հատկապես` ապագայի: Նույն թերթի նույն հեղինակի մեկ այլ մանվածապատ ու ծեքծեքուն շարադրանքից կարելի է հասկանալ, որ նա մտերիմ հարաբերություններ ունի երկրի ամբողջ ղեկավարության հետ, ուստի անգամ ամենա-ամենա ղեկավարներին դիմում է անունով, տնավարի, հեգնանքի ու նույնիսկ ծաղրանքի երանգներով, մի վարքագիծ, որը ամբողջովին ու լիովին բնութագրում է երկրիս լրագրողական այդ թևի մակարդակը: Եվ կրկին «դաշտ է նետվում» այն լուրը, թե ՀՀԿ նախընտրական ցուցակը գլխավորելու է վարչապետը:
«Ժամանակը» բացահայտել է Ռոբերտ Քոչարյանի «բացասական» հատկանիշներից ևս մեկը. պարզվում է` գնելով Տալվորիկ գյուղի հողատարածքից 3 հազար հեկտարը (ի դեպ ամեն մի քմ դիմաց վճարելով 130 դրամ), ՀՀ երկրորդ նախագահը լավ հարևանություն չի անում գյուղացիների հետ: Նրա գնած հողը, ըստ տալվորիկցիների, չի մշակվում, աշխատատեղեր չեն ստեղծվում:
Կառավարության երեկվա նիստը տարբեր ծավալներով լուսաբանել են բոլոր լրատվամիջոցները, մասնավորապես «Հայաստանի Հանրապետությունը», որը օրակարգի հարցերի վերաբերյալ հարցազրույց է արել մի քանի նախարարների հետ: Ահա մյուս թերթերի հրապարակումների վերնագրերը. «Ընթացակարգը հեշտացվեց. առաջիկայում կպարզեցվի ընկերությունների հիմնադրման ընթացակարգը»: «Գազամատակարարման դադարը միտումնավոր չէ» («Առավոտ»), «Կկառուցվի Մեղրու ՀԷԿ-ը», «Ընկերությունները կստեղծվեն մեկ օրում` մեկ պետական հաստատությունում» («Ազգ»), «Հայաստանն ու Իրանը երկու հէկ կկառուցեն. ներդրումները կանի իրանական կողմը», «Նախարարը հակասում է վարչապետին» («Կապիտալ»), «Գնա Մեղրի, արի սիրեմ», «Նաիրիտը» կգործարկվի՞» («Հայկական ժամանակ»):
ՏՏ ոլորտում աշխատող ձեռնարկությունների միության գործադիր տնօրենը «Դելովոյ էքսպրեսին» տված հարցազրույցում հավաստում է, որ «Հայաստանը կորցնում է իր մրցակցային առավելությունները» և հանգամանորեն պարզաբանում, թե ինչու:
