Հայաստանի Հանրապետության Կառավարություն

«Հայկական ժամանակին» դուր չի գալիս, որ Արժույթի միջազգային հիմնադրամի ներկայացուցիչները մի կողմից «քաջատեղյակ են հայաստանյան տնտեսության վիճակին, մյուս կողմից ստիպված են իրենց հրապարակային ելույթներում հնարավորինս քիչ ու մեղմ քննադատել կառավարությանը»։ ԱՄՀ ներկայացուցիչ Գիերմո Տոլոսային հորդորելով ավելի բաց խոսել, («Ասա, խոսա, թող սֆաթդ բացվի»), «ՀԺ»-ի Հայկ Գևորգյանը ներկայացնում է ԱՄՀ-ի քննադատական դիտարկումները, դրանց վեհերոտությունը պատճառաբանելով մի «կարևոր հանգամանքով»՝ «Հայաստանը որքան շատ պարտք ունենա, այնքան մեծ կլինի կախվածությունը Արևմուտքից և Ռուսաստանից»։
Գիերմո Տոլոսայի ասուլիսն առավել հանգամանորեն է լուսաբանել «Կապիտալը» («Հայաստանը չի կարող աճել միայն շենք կառուցելով»), ընդգծելով ԱՄՀ-ի ներկայացուցչի հիմնական մտահոգություններն առ այն, որ անհրաժեշտ է խթանել արտահանումը, բարելավել գործարար միջավայրը, արդիականացնել հարկային վարչարարությունը, ավելի համարձակ ու խոր բարեփոխումներ իրականացնել, քանի որ երկու տարի անց ՀՀ բյուջեի 25%-ը դրվելու է արտաքին պարտքի սպասարկմանը։
Ուշադրություն հրավիրելով, որ 14 տոկոսանոց տնտեսական անկումից հետո Հայաստանի տնտեսությունն այժմ դանդաղ տեմպերով վերականգնվում է, «Ազգը» շեշտադրում է անում այն հանգամանքի վրա, որ ըստ ԱՄՀ-ի ուսումնասիրությունների «զավեշտալի բարձր են» ԱԱՀ գերավճարները։
Անդրադառնալով «ՀՀ ֆինանսների նախարարության գործունեության ծրագիր» փաստաթղթին և համեմատելով նախորդ կառավարությունների գործունեության հետ, «168 ժամի» մեկնաբան Արա Գալոյանն այն անվանում է «ընթեցողի հոգին փառավորող և ինչ-որ տեղ անկեղծ փաստաթուղթ», սակայն խիստ մտահոգված է, որ «ազգային անվտանգության տեսանկյունից գրված տնտեսական փաստաթղթում նշվում է, որ ստեղծված իրավիճակը կառավարությանը պարտադրում է առևտրային պայմաններով փոխառու միջոցներ ներգրավել, ինչը նշանակում է հարաճուն տեմպերով ավելացնել երկրի պարտքը»:
«Հայկական ժամանակի» խմբագիր Նիկոլ Փաշինյանին խիստ վշտացրել է վարչապետ Տիգրան Սարգսյանի խոսքն այն մասին, որ հայոց բանակը վայելում է ժողովրդի բացարձակ վստահությունը։ Արդյո՞ք նրան մտորելու նոր առիթ չի տա այս անգամ էլ «Կապիտալի» հրապարակումը, որ վերնագրված է՝ «Վարչապետը շատ գոհ է վերահսկիչից»։
ԱՊՀ բարձրագույն վերահսկիչ մարմինների ղեկավարների խորհրդի 10-րդ նշտաշրջանը շատ ԶԼՄ-ների է հետաքրքրել, «168 ժամին» հատկապես դուր է եկել ՌԴ հաշվիչ պալատի նախագահ Սերգեյ Ստեպաշինի մի խոսքը, որն էլ դարձել է հրապարակման վերնագիր՝ «Հարկավոր է բռնել ու նստացնել»։