Հայաստանի Հանրապետության Կառավարություն

Մի քանի թերթեր շարունակել են անդրադառնալ ՀՀ ֆինանսների նախարար Տիգրան Դավթյանի 2011 ՀՀ պետական բյուջեի նախագծի վերաբերյալ ասուլիսին. «Կայուն զարգացման բյուջե» («Ռեսպուբլիկա Արմենիա»), «Ընդլայնողական քաղաքականությունը ավարտվել է» («Դելովոյ էքսպրես»): Մասնավորապես «Հայկական ժամանակը» նախ «իր հանգույն» տեղեկացրել է, որ «Մեղրիով անցնող երկաթգիծն ամբողջությամբ ապամոնտաժվում է», ապա ընթերցողներին փորձել ապացուցել, որ Իրան-Հայաստան երկաթուղու և ՀՀ-ում կառուցվելիք նոր ատոմակայանի նախագծերը «պետք է դասել հեքիաթայինների շարքին» և «մերոնք «Հայկական աշխարհ են կառուցում, որը նույնիսկ չգիտեն ինչ է»: «Իրավունքը» իր վերաբերմունքն արտահայտել է հոդվածի վերնագրով` «Հայաստանում 1+1-ը կարող է 3 էլ լինել»` հընթացս չմոռանալով նաև նշել, թե «ՊԵԿ-ը արդեն խուսափում է պատշաճ տեղեկատվություն ներկայացնել» ու «հեքիաթասացության սինդրոմ» որակելով գալիք տարվա տնտեսական վիճակի մասին կանխատեսումները: «Կապիտալը» տեղեկացրել է, որ Հայաստանի կառավարության և ԱՄՀ-ի հաշվարկները տնտեսական աճի վերաբերյալ համընկել են. «այս տարի 4 տոկոս, 2011թ. համար 4.6%, իսկ 2015թ. համար 4 տոկոս»: «Հայոց աշխարհը» գալիք տարվա բյուջեով գիտությանը տրամադրվող գումարների զգալի ավելացումը համարել է «ուշագրավ իրողություն», վերստին փաստելով, որ «գիտության ոլորտը բարեփոխման կարիք ունի», նույն «Հայկական ժամանակը» իր «բողոքի գրքում» փոխանցել է գիտնականի կին և մայր Ս.Վարդանյանի հարցերը ՀՀ վարչապետ Տիգրան Սարգսյանին:
Երեկ ՀՀ ԱԺ-ի կողմից «Ակցիզային հարկի» և «Ծխախոտի արտադրանքի համար հաստատագրված վճարների մասին» օրենքների ընդունման իրողությանը «Իրավունքը» անդրադարձել է ԲՀԿ առաջնորդ Գագիկ Ծառուկյանի հետ զրույցի միջոցով, «Կապիտալը» եզրակացրել է, որ «Ծխելը, խմելը և քշելը բյուջեն ավելի շատ կլրացնեն», «Հայոց աշխարհը» թե` «Ինչպես կտրել հայրենական արտադրության ծուխը»:
«Առավոտը» լուսաբանել է կառավարության երեկվա նիստը, շեշտել ՀՀ ԿԱ պետգույքի կառավարման վարչության պետին տրված հարցերի անհստակ և անվստահ պատասխանները` «Լուծարում` անհայտ պատճառներով», նաև նշել, որ երեկ Գյումրիում բացվել է «Շիրակ էքսպո» 2010 տոնավաճառ-ցուցահանդեսը», փոխանցելով մի քանի շիրակցի գործարարների դժգոհությունը «սահմանված ծանր հարկերից», որ «բիզնեսին խանգարողը օլիգարխիան է», որ «կառավարությունն ավելի շատ խոսում է, քան գործում»: Թերթը հոդված է նվիրել նաև քաղաքացիական ծառայողների բազային աշխատավարձի մեծության և վարձատրության համակարգի վերաբերյալ զեկույցի հաստատմանը` «Օրենքի դրույթները կիրառելի են սակավաթիվ մարմիններում, բացահայտել է ՀՀ աշխատանքի և սոցիալական հարցերի նախարարությունը»: Պարբերականի փոխանցմամբ երեկ ոստիկանությունը անվտանգության ապահովման պահանջներին առնչվող խախտումների հայտնաբերման նպատակով ստուգումներ է նախաձեռնել փողի փոխանակման կետերում:
«Իրավունքը» մեջբերել է մի հատված ՀՀ վարչապետի բլոգի «Բողոքի գիրք» բաժին դիմած մոսկվաբնակ Կարեն Միրզոյանի նամակից. «Հասկանալով Ձեր զբաղվածության աստիճանը, այնուամենայնիվ խնդրում եմ Ձեր անմիջական հսկողության տակ վերցնեք Զարուհի Պետրոսյանի սպանության ցնցող դեպքը»: Նույն թերթի «Բամբասանք» խորագրի ներքո հայտնվում է, որ իբր «Հայաստանի սահմաններից դուրս իրար են հանդիպել Ռոբերտ Քոչարյանն ու Վլադիմիր Պուտինը» և քննարկել մեծ քաղաքականություն վերադառնալու հնարավորությունները:

* * *

Ի պատասխան «Նաիրիտի» աշխատակիցների` մեր թերթում տպագրված բաց նամակի, ՀՀ էներգետիկայի եւ բնական պաշարների նախարարությունը հանդես է եկել հետեւյալ հաղորդագրությամբ. «Նաիրիտ» գործարանի մի խումբ աշխատակիցներ բաց նամակով դիմել են ՀՀ վարչապետ Տիգրան Սարգսյանին և պարզաբանումներ խնդրել գործարանում ստեղծված իրավիճակի եւ արդեն հայտնի խնդիրների հանգուցալուծման վերաբերյալ: Ի պատասխան «Նաիրիտի» աշխատակիցների նամակի` տեղեկացնում ենք, որ վարչապետի հանձնարարությամբ ՀՀ էներգետիկայի եւ բնական պաշարների նախարար Արմեն Մովսիսյանը հանդիպել է «Նաիրիտի» մի խումբ աշխատակիցների հետ: Հանդիպման ժամանակ պարզաբանումներ են տրվել ինչպես աշխատավարձի, այնպես էլ «Նաիրիտի» հետագա գործարկման հետ կապված խնդիրների շուրջ: Փոխադարձ պայմանավորվածություն է ձեռք բերվել ստեղծված խնդիրները հաղթահարելու եւ աշխատանքային բնականոն ռիթմի վերադառնալու համար անհրաժեշտ քայլեր ձեռնարկելու շուրջ»:

«Հայկական ժամանակ», 08.10.2010