Հայաստանի Հանրապետության Կառավարություն

«Հոկտեմբերի լույս 29-ի գիշերը հրդեհվել է Սյունիքի մարզի Լեռնաձոր գյուղի ուրանի պաշարների երկրաբանահետախուզական աշխատանքների համար այստեղ բերված հորատող սարքավորումը, որն արդեն մի քանի օր է` աշխատում էր գյուղում»,- հայտնում է «Առավոտը»: «Ազգի» փոխանցմամբ Report.am-ն առաջարկում է կառավարությունում ստեղծել «տասնիններորդ նախարարությունը» և այն անվանել «դիտորդական»: Հիմնական բաժինը կլինի «Youtube դիտելիս»: Հոդվածագիրն հիանում է իր սրամտությամբ և շարունակում զոռ տալ երևակայությանը` «Ամեն հինգշաբթի անցկացվող կառավարության նիստերի փոխարեն էլ կարելի է Youtube-ադիտում անցկացնել»: Ահա թե ինչպես է հայրենի լրագրողն օգտագործում հեգնանքն իբրև ժանր: Այս «տվածուրիկ» շնորհից զուրկ չէ «Հայկական ժամանակը». «Տեսանկյունը» գնաց Հ1: Ստուդիան նոր է, բայց մնացածը մնացել է նույն որակին»: Այսպիսի, հիմնականում խոժոռ հայացքով դիտելով հեռուստաեթերը, թերթը վերհիշում է վարչապետի կոստյումներին առնչվող ՀՅԴ պատգամավորի հարցը, անցնում բողոքի ալիքի վրա տարուբերվող Ֆրանսիա, կրկին վերադառնում, որպեսզի հավաստի` «մենք համբերատար ժողովուրդ ենք ու դրանով հպարտանում ենք»: Իսկ մինչ այդ «ստվերը թանձրանում է»,- ազդարարում է մեկ այլ «ՀԺ»-ական և նույնպես գործի դնելով հեգնանքի փորձված հմտությունը, նկարագրում, թե ինչպես են հարկային ու մաքսային մուծումները պակասեցնում մեր օլիգարխները: «Գոլոս Արմենիին» («Բիզնեսի ու մանդատի արանքում») և «Ժամանակը» («Դավիթ Հարությունյանն ընդդեմ բիզնեսմենների») առաջիկայում «հետաքրքիր զարգացումներ» են գուշակում ՀՀԿ խմբակցության անդամ Դ.Հարությունյանի մշակած նախագծից, որով պատգամավորին լիովին արգելվում է զբաղվել ձեռնարկատիրությամբ: Ընդ որում, նախագիծը «լրագրողներից դեռ գաղտնի է պահվում»:
Լայնորեն լուսաբանվել է Դիջիթեք-2010-ը. «ՏՏ ոլորտում` տարածաշրջանային կենտրոն. Երևանում բացվեց ամենամյա միջազգային տեխնոլոգիական ցուցահանդեսը» («Հայաստանի Հանրապետություն»), «Եվ որակ, և քանակ» («Գոլոս Արմենիի»), «Հայ չինովնիկներին Մերսեդես է պետք, ոչ թե ՏՏ լուծումներ» («Կապիտալ»):