Հայաստանի Հանրապետության Կառավարություն

«168 ժամը» կառավարության վերջին նիստում մի քանի «նախարարություններին թերացումների և կոռուպցիոն երևույթների համար» ՀՀ վարչապետ Տիգրան Սարգսյանի քննադատությունը բնորոշել է առաջիկա խորհրդարանական ընտրությունների նախօրեին Տիգրան Սարգսյանի վարկանիշը բարձրացնելու իշխանությունների փորձ և եզրակացրել. «Բարձրացնում են անբարձրանալին»: Թեմային անդրադարձել են նաև «Գոլոս Արմենիին» ու «Առավոտը», որն ի մասնավորի ակնարկել է, թե իբր «ցասումնալից հակակոռուպցիոն ելույթի» պատճառը նաև «Տիգրան Սարգսյանի անձնական PR-ն էր»: «Կապիտալը» փոխանցել է երեկ Կոտայքի մարզի Գառնի գյուղում լրագրողների հետ հանդիպման ժամանակ վարչապետ Տիգրան Սարգսյանի կատարած հայտարարությունը. «Աղետի գոտում ներդրումները կկազմեն 250 մլն դոլար»:
Վերահսկիչ պալատի նախագահ Իշխան Զաքարյանի երեկվա հրապարակումները «Գեոպրոմայնինգ Գոլդ» ընկերությունում կատարված ուսումնասիրությունների վերաբերյալ գրավել են մի քանի լրատվամիջոցների սևեռուն ուշադրությունը. «Ոսկու հանքերում` քյանդրբազություններ» («Ազգ»), «Ոսկի ծախողներին կծախե՞ն» («Կապիտալ»), «Ում կպաշտպանի կառավարությունը» («168 ժամ»):
«Ժամանակը» ԿԳ նախարարությունում անցկացված ուսումնասիրությունների առիթով հրապարակել է «Վարչապետն ու Վերահսկիչ պալատն ընդդեմ սափրագլուխ նախարարի» հոդվածը: Մի այլ հրապարակման մեջ թերթը Գյուղնախարարության աշխատակցի միջոցով «աչքալուսանք է արել», որ «Հայաստանի սպառողական շուկայում այսօր առավոտյան պանիրը 400 դրամով էժանացել է»` «արտադրողների եկամուտների հաշվին»:
«Հայկական ժամանակը» շարունակել է հետևել դրամի փոխարժեքի տատանումներին և արձանագրել, որ «»ավարտվող շաբաթը դրամն ամփոփել է արժեզրկմամբ», և «նման բան չէր արձանագրվել արդեն 10 շաբաթ»:
«Ժամանակի» հետ զրույցում ԿԲ նախկին նախագահ Բագրատ Ասատրյանը վերջին շրջանի թանկացումների գլխավոր պատճառը համարել է այն համակարգը, որ առկա է. «օլիգարխիկ տնտեսություն, կոռուպցիա, մի քանի ընտանիքների տնտեսական ու քաղաքական մենաշնորհներ և այլն»: