Հայաստանի Հանրապետության Կառավարություն

«Հայոց աշխարհի» փոխանցմամբ Երևանում անցկացվող հայ-ամերիկյան միջկառավարական հանձնաժողովի նիստում ԱՄՆ կառավարության ներկայացուցիչ Դ.Ռոզենբլյումը նշել է տնտեսական զարգացման ուղղությամբ Հայաստանի արձանագրած մեծ առաջընթացի, նաև «հատկապես կառավարման բնագավառում» ծառացած մարտահրավերների մասին։ «Կապիտալը» տեղեկացրել է, որ «Հայաստանում կառուցվելիք նոր ատոմային էներգաբլոկի նախագիծը շարունակում է հետաքրքրել ամերիկյան ընկերություններին»։ «Ժամանակը», անդրադառնալով միջկառավարական նիստի աշխատանքին, նշել է «Հայաստանի իրական հատվածում կատարված ուղղակի ներդրումների ծավալը» ամերիկյան ընկերությունների կողմից՝ 3,8մլն դոլար, և այն համարել «ծիծաղելի»։
«Հայկական ժամանակը» ըստ իր տեղեկությունների գրել է, թե ՀՀ վարչապետը Բրյուսելից վերադարձել է «դատարկաձեռն», քանի որ չի հաջողվել «ԵՄ չինովնիկներին համոզել, որ չհրաժարվեն Հայաստանին տրամադրել խոստացված 100մլն եվրո դրամաշնորհը»։ Երկու այլ հրապարակումներում թերթը «քննության է առել» ՀՀ ՊԵԿ նախագահ Գ.Խաչատրյանի «պաշտոնանկության հարցը», ինչպես նաև «Հայաստանում արձանագրվող գների աճը», կամ, ավելի պարզ՝ կյանքի թանկացումը», ինչը, ըստ հոդվածագրի, «այնքան էլ համարժեք չեն ընկալում գործող իշխանավորները»։ «Իրավունքը» նկատել է, թե «թանկացումները հիմնականում արհեստական բնույթի են», նաև հավելել, թե «արդեն կասկածից դուրս է, որ այս տարի պաշտոնական գնաճը ընդհուպ կմոտենա 10 տոկոսի սահմանագծին», և «փաստացի թանկացումները հասնում են շատ ավելի մեծ չափերի»։ «Առավոտը» ահազանգել է Գյումրեցի մի գործարարի մասին, որն իր գերդաստանով լքում է երկիրը և «իր բիզնեսը տեղափոխում է հարևան Վրաստան»։ «Հայոց աշխարհը» կարծիք է հայտնել, որ «ճգնաժամից հարստանում են միայն բանկերը»՝ արտաքին աղբյուրներից ներգրավված միջոցների հաշվին, մինչդեռ «տնտեսությունը, վարկային բարձր տոկոսադրույքների պատճառով», դարձյալ կանգնած է «կոտրած տաշտակի առջև»։
«Կապիտալը» «Վերահսկիչ պալատը խախտել է Սահմանադրությո՞ւնը» հարց  - խորագրով հրապարակել է «Գեոպրոմայնինգ Գոլդ» ընկերության պաշտոնական հաղորդագրությունը: