հինգշաբթի, 18 նոյեմբերի 2010
Բյուջետային քննարկումների և ՎՊ բացահայտումների շուրջ
«Առավոտը», անդրադառնալով ԱԺ-ում 2011թ. ՀՀ պետական բյուջեի նախագծի քննարկմանը ու կառավարության հետ հարցուպատասխանի մանրամասներին, ոչ պատահաբար առանձնացրել է աղքատության ավելացման կանխատեսման մասին «պատգամավորական հարցին» ՀՀ վարչապետի պատասխանը. «հետճգնաժամային աշխարհը նման չի լինելու մինչճգնաժամային աշխարհին», նաև հավելել գնաճի վերաբերյալ ֆինանսների նախարարի մեկնաբանությունը. («Հուսով ենք, որ հաջորդ տարվա համար մեր կանխատեսումները իրատեսական են» և «կառավարության ու ԿԲ-ի կողմից գնաճը զսպելու քայլեր են ձեռնարկվում»): «Հայկական ժամանակը» հնչեցրել է «ահազանգ», թե իբր «կառավարությունն իր վարչապետի առաջնորդությամբ» մինչև օրս «ոչինչ չի արել` բացի պարտքեր վերցնելուց», թե վարչապետի` «բյուջեի մասին ելույթները սպառնալիք են մեր երկրի անվտանգությանը»: Եվ այլն:
Մամուլում շարունակվել է ՎՊ-ի և ԱԺ պատգամավոր Սպարտակ Մելիքյանի միջև հակամարտության թեմայի արծարծումը «նոր երանգավորումներով»: «Ժամանակը» այն բնորոշել է որպես «Սպարտակի ապստամբությունն ընդդեմ Իշխանի պալատի»: «Հայոց աշխարհը» գրել է, որ ՎՊ ղեկավար Իշխան Զաքարյանի հրապարակած հաշվետվությունը խորհրդարանում «միանգամայն որոշակի մտորումների տեղիք է տալիս»: «Առավոտը» մի քանի այլ պարբերականներին միանալով տեղեկացրել է, որ ՎՊ-ը դիմել է դատարան` պահանջելով ՀՀԿ խմբակցության պատգամավորին պարտավորեցնել ԱԺ ամբիոնից ներողություն խնդրել», իր հերթին «պատգամավորը այսօր կառաջարկի զրկել իրեն անձեռնմխելիությունից», որպեսզի «որևէ մեկը չասի, թե կաշկանդում եմ... քննությունը մինչև վերջ տանելու համար»: «168 ժամը» նշել է, թե ԱԺ-ում երեկ շարունակվել են փոխադարձ մեղադրանքները պատգամավորի ու ՎՊ նախագահի միջև, փորձել փնտրել-գտնել քաղաքական ենթատեքստ և հարցրել` «Ո՞ւմ ականջներն են երևում «ձայնազուրկ» պատգամավորի ետևից»: Մի այլ հրապարակման մեջ թերթը զարմանալի է համարել, որ վարչապետ Տիգրան Սարգսյանը կառավարության նոյեմբերի 4-ի նիստի ժամանակ «Ոստիկանությանը շրջանցել է» և «որևէ կերպ չի անդրադարձել այնտեղ գոյություն ունեցող անօրինական երևույթներին»:
«Առավոտը» նախարարությունների գործունեության վերաբերյալ դիտողությունների ու քննադատության առիթով հարցրել է, թե դա «հերթական PR քա՞յլ» է, «թե՞ արդյունավետ կադրային քաղաքականությանն ուղղված անկեղծ ջանք»: Երկու այլ հրապարակումներում թերթը նկատել է, թե «դատելով Հայաստանի կառավարիչների քայլերից». խնդիր է դրված դեղամիջոցների վաճառքն էլ կենտրոնացնել օլիգարխների ձեռքում», նաև հավելել, թե ըստ ձկնաբույծների «կառավարությունը ոլորտի խնդիրները միայն իրենց վզին է փաթաթում»: «Ժամանակը» անդրադարձել է Ճարտարագիտական համալսարանի ուսանողների հետ վարչապետի հանդիպմանը և կարծիք հայտնել, թե «օտարալեզու դպրոցների խնդիրը կապելով օտար լեզուների տիրապետելու խնդրի հետ», Տիգրան Սարգսյանը «ըստ էության, խեղաթյուրում է իրականությունը»:
«Ազգը» «զավեշտալի» է համարել իրողությունը, որ «ՀԴՄ կտրոնների շահումները և բոնուսները դարձյալ չեն տրամադրվում»:
