երեքշաբթի, 30 նոյեմբերի 2010
Տեղական արտադրողների շահերը
«Ազգը», հիշատակելով հայտնի ճշմարտությունը, որ տնտեսության կենսունակության և զարգացման գրավականը տեղական արտադրությունն է, միաժամանակ առաջադրել է տեղական արտադրողներին աջակցման ու նրանց կողմից սպառողների շահերի պաշտպանության հիմնահարցը, գտնելով, որ եթե «շարունակվի այնպես, ինչպես հիմա է, ապա կտուժենք բոլորս»:
«Իրավունքը» և «Ժամանակը» անդրադարձել են Գյուղատնտեսության նախարարության բուսասանիտարիայի տեսչության պետ Վռամ Գուրզադյանի աշխատանքից ազատման «նոր մանրամասներին», ըստ որոնց, մասնավորապես Վ.Գուրզադյանի մեկնաբանությամբ, ՕԵԿ-ական նախարարի միջոցով աշխատանքից ազատվել է նախկին ՕԵԿ-ականը` Արթուր Բաղդասարյանի հրահանգով: «Առավոտը» վկայակոչել է 2012թ. հունվարի 1-ից եվրոպական չափանիշներով (GMP պայմաններով) դեղարտադրություն իրականացնելու մասին կառավարության որոշումը և նշել, որ այդ ամենին հասնելու համար «դեղագործներից մեծ ծախսեր են պահանջվում», նաև փոխանցել «Արփիմեդ» դեղ արտադրող ընկերության տնօրեն Վաչագան Ղազարյանի կարծիքը, որ «դա ավելի թափանցիկ կդարձնի դեղարտադրության գործընթացը»: Դեղերի շուկային անդրադառնալով ըստ սեփական «իշխանական աղբյուրների» հաղորդման, «Ժամանակը» գրել է, թե իբր վարչապետ Տիգրան Սարգսյանը «մտադիր է վերաբաժանում կատարել» և դառնալ «այդ շուկայում ազդեցիկ դիրք ունեցող ներկրողներից մեկը»: «Հայկական ժամանակի» փոխանցմամբ կառավարությունը առաջիկայում քննարկելու է «Սևանա լճի ափին բարձր լեռնային մարզական կենտրոն» ստեղծելու հայեցակարգը և, միաժամանակ, կարծիք հայտնել, թե «դժվար թե որևէ նորմալ երկրում որևէ մարզական կենտրոն կառուցելու համար հայեցակարգ ընդունվի»: «Կապիտալը» ներկայացրել է երեկ հրավիրված ասուլիսում «Ավարայրտուր» տուրիստական ընկերության տնօրեն Արմեն Սահակյանի դիտարկումը, թե «Հայաստանում զբոսաշրջիկների հաշվառման կարգը թերի է», երկիր «մուտք գործող բեռնատար մեքենաների վարորդներին ներառում են զբոսաշրջիկների դասում», փոխանցել նաև Ներգնա տուրօպերատորների միության նախագահ Ռոբերտ Մինասյանի «խոստովանությունը», ըստ որի «ոլորտում աշխատող կադրերի 95%-ից ավելին համապատասխան մասնագիտական կրթություն չունի»: Մի այլ հրապարակման մեջ թերթը զետեղել է Հայաստանի ավտոապահովագրողների բյուրոյի գործադիր տնօրեն Վահան Ավետիսյանի հայտարարությունը, որ «ԱՊՊԱ համակարգը լրացուցիչ բարդություն չի առաջացնի առուծախով հաճախ զբաղվող վարորդների հետ», և «չի խանգարի մեքենաների վաճառքին»:
