Հայաստանի Հանրապետության Կառավարություն

Ընթացիկ տարվա հունվար-հոկտեմբեր ամիսների սոցիալ-տնտեսական իրավիճակի վերաբերյալ ԱՎԾ-ի երեկ հրապարակած տվյալները «Հայկական ժամանակին» դրդել է նախ հերթական անգամ «անսպասելիորեն զարմանալ» («Էս ներդրումներն ինչու նվազեցին», «Էս գներն ինչու աճեցին»), ապա ներկայացնել այդ տվյալներն ու կարծիք հայտնել, թե «Ճգնաժամային տարվա... ցուցանիշների հետ համեմատության մեջ այս տարվա ցուցանիշները ավելի վատ են»: «Ժամանակը» հավելել է, թե Հայաստանն աստիճանաբար վերածվում է «բարձր գնաճ արձանագրող երկրի, և գների ճախրանքը սպառնում է դառնալ խրոնիկ»: «Հայոց աշխարհը» տեղեկացրել է, թե «ինչի հաշվին է ավելացել արտահանումը» Հայաստանից (շուրջ 800 մլն դոլարի ապրանք), նաև կարևորել, որ զգալի աճ կա թանկարժեք քարերի ու մետաղների և դրանցից պատրաստված իրերի արտահանման ոլորտում: «Առավոտը» գրել է, թե «հետաքրքիր իրավիճակ է ստեղծվել» «Գեոպրոմայնինգգոլդ» և «Հարավկովկասյան երկաթուղի» կազմակերպությունների շուրջ և բարձրացնելով հարցը, թե «ով է շահագրգռված մեր երկրից խոշոր ներդրողների հեռանալու մեջ», հավելել. «Թվում է, թե GPM Gold-ին և ՀԿԵ-ին վարկաբեկելու փորձերը նախագահական ինստիտուտին նետված մարտահրավեր են»: Մի այլ հրապարակման մեջ թերթը նշել է Ախուրյանի շաքարի գործարանի աշխատակիցների` դեկտեմբերի 1-ից «անհայտ ժամանակով հարկադիր արձակուրդի» գնալու առիթով դժգոհության մասին և հարցրել. «Շաքարի գործարանը դեռ չբացված` փակվո՞ւմ է»:
«Հայկական ժամանակի» փոխանցմամբ ՀՀ վարչապետ Տիգրան Սարգսյանը երեկ ստորագրել է ՀՀԿ փոխնախագահ Գալուստ Սահակյանի ավագ որդուն` Տիգրան Սահակյանին ՀՀ առողջապահության փոխնախարար նշանակելու մասին «վաղուց սպասված որոշումը». թերթը հավելել է նաև, թե Առողջապահության նախարարն այժմ շրջապատված է բացառապես այնպիսի տեղակալներով, որոնք կամ ՀՀԿ անդամ են, կամ «վայելում են այդ կուսակցության ղեկավարության վստահությունը»: «Ժամանակը» «նախընտրական շրջանի մոտենալուն զուգահեռ ներքաղաքական ինտրինգը» փորձել է գտնել «ՀՀԿ-ԲՀԿ տիրույթում», դրանով բացատրել ՀՀ ֆուտբոլի ֆեդերացիայի ղեկավարության կազմից երկու ԲՀԿ-ականների փոխարեն «հանրապետականների նշանակումը» և հարցրել «Ծառուկյանը գործո՞ն, թե՞ խաղից դուրս»:
«Կապիտալը» անդրադարձել է երեկ Զարգացման հայկական գործակալության կազմակերպած «Օտարերկրյա ուղղակի ներդրումները Հայաստանում» խորագրով համաժողովին, որին մասնակցել է նաև էկոնոմիկայի նախարար Ներսես Երիցյանը և որի դիտարկմանը, թե «Հայաստանն իր առջև խնդիր է դրել 2013թ. ՀԲ կողմից հրապարակվող Doing Business զեկույցում տեղ զբաղեցնել լավագույն քսանյակում», թերթը դժվարացել է համաձայնել: Թերթի երկու այլ հրապարակումները համապատասխանաբար ներկայացրել են «Հայության ապագան թափոններն են» հոդվածը, որում հեղինակը մասնավորապես կարծիք է հայտնել, թե « տեղեկատվական տեխնոլոգիաներում հայ մասնագետները կարող են լինել միայն երկրորդ դերերում», և տեղեկատվություն, որ ՎԶԵԲ-ի ներդրումները այս տարի Հայաստանում կկազմեն 80 մլն դոլար, որոնք կտրամադրվեն տարբեր ոլորտներում իրականացվող 26 ծրագրերին: