Հայաստանի Հանրապետության Կառավարություն

ՀՀ վարչապետ Տիգրան Սարգսյանի երեկվա հանդիպումը ՌԴ վարչապետ Վլադիմիր Պուտինի հետ Սանկտ Պետերբուրգ քաղաքում օրվա մամուլի ուշադրության կենտրոնում է` տարակերպ մեկնաբանություններով: «Հայկական ժամանակը», նշելով հանդիպման ժամանակ ՌԴ վարչապետի հույսհայտնումը, թե ՀՀ նախագահի ու վարչապետի աջակցությամբ ռուսաստանցի «գործարարներն իրենց ավելի հարմարավետ կզգան» և ՀՀ վարչապետի դրական պատասխանը, հարցրել է, թե «Է՞լ ինչ են ուզում ռուսները»` թվարկելով, թերթի փոխանցմամբ, «այլ տարբերակով... ռուսներին հանձնված» ձեռնարկությունները և առանձին ոլորտները: «Կապիտալը» մասնավորապես կարևորել է նախ ՌԴ վարչապետի հիշեցումը, թե «չնայած 2009-ը լի էր դժվարություններով, այդուհանդերձ, Ռուսաստանը Հայաստանին աջակցել է` արտոնյալ պայմաններով տրամադրելով 500մլն դոլարի վարկ, ապա նաև ակնարկ-ակնկալիքը, որ «ռուս գործարարները Հայաստանում ավելի լավ զգան»: «168 ժամը» ոչ պատահական է համարել երկու երկրների վարչապետների հանդիպումը ՀՀ ԱԺ-ում «Լեզվի մասին» և «Հանրակրթության մասին» օրենքներում լրացումների և փոփոխությունների իրականացումից հետո: Մի այլ հրապարակման մեջ թերթն անդրադարձել է նաև ռուսական «ՌԲԿ» գործարար թերթի զրույցին ՀՀ վարչապետ Տիգրան Սարգսյանի հետ («Էվոլո՞ւցիա, թե՞ «Ռևոլուցիա». ո՞րն է հոգեպես ավելի ապահով»):
«Առավոտը» կարծիք է հայտնել, թե էներգետիկայի և բնական պաշարների նախարարությունում ստեղծված հանձնաժողովը, որն ուսումնասիրում է ռուսական կապիտալով գործող «Գեոպրոմայնինգ գոլդ» ընկերության կողմից թույլ տրված խախտումների վերաբերյալ ՀՀ ՎՊ եզրակացությունը, առաջիկայում այլ ելք չի ունենա, «քան ջրել ՎՊ-ի աղմկահարույց բացահայտումները»:
«Ժամանակը» գրել է, թե ըստ պաշտոնական վիճակագրության, մասնավորապես ՊԵԿ-ի, ֆինանսների նախարարության և ԱՎԾ հրապարակած թվերի պարզ համեմատությունը «փաստում է», որ Հայաստանի 343 ամենախոշոր հարկատուները «ավելի քիչ են ավելացրել բյուջե վճարվող հարկերն ու պարտադիր վճարները» և եզրակացրել, թե «որքան շատ է խոսվում փոքր ու միջին բիզնեսի աջակցության մասին, այնքան շատ է «ճզմվում» փոքր ու միջին բիզնեսը»: «Երկրի» հետ զրույցում էկոնոմիկայի նախկին նախարար Վահրամ Ավանեսյանը մասնավորապես նշել է, թե «շատ լուրջ բացթողում է համարում պետական ծառայողի ցածր աշխատավարձը», նաև դեմ է «կառավարության բոլոր հավակնոտ ծրագրերին», քանի որ «ներկայումս շատ կարևոր է... առաջ գնալ քայլ առ քայլ»:
«2011-ի բյուջեն ամենավատն է»,- «Առավոտում» այսպես է գնահատել ՀՀ տնտեսական վիճակը ԿԲ նախկին նախագահ Բագրատ Ասատրյանը և պնդել, թե «այս տարի ևս ԿԲ փողերը քամուն է տվել»: Մի այլ հրապարակման մեջ («Հին ու նոր խոտանը») թերթը վերստին անդրադարձել է վերջերս կատարված պաշտոնանկությունների թեմային և կարծիք հայտնել, թե «ամեն ինչ կատարվում է այնպես, ինչպես կարգադրել էր...Բիվալովը «Վոլգա-Վոլգա» ֆիլմից. «Ընդունել քաղաքացիներից խոտանը և հանձնել նրանց նորը»: