երեքշաբթի, 28 դեկտեմբերի 2010
Նախատոնական «բարեմաղթանքներից» մինչև...
Ընթացիկ տարվա ավարտին «Հայոց աշխարհը» փորձել է վերլուծել տնտեսության ոլորտում ձեռքբերումները և հանգել եզրակացության, որ այն «»դանդաղ դուրս է գալիս ճգնաժամից», մասնավորապես «նախորդ տարվա լուրջ թերակատարումից հետո հաջողվել է ապահովել պետական բյուջեի հարկային եկամուտները», «ակտիվացել է վարկային շուկան»: Թերթը նաև փոխանցել է ԱԺ ֆինանսավարկային և բյուջետային հարցերի և տնտեսական հարցերի հանձնաժողովների նախագահներ Գագիկ Մինասյանի և Վարդան Այվազյանի գնահատականները իրենց կատարած աշխատանքի արդյունքների վերաբերյալ («Ե՞րբ ստվերային տնտեսության դեմ պայքարը արդյունավետ կլինի»): «Իրավունքը» անդրադարձել է ձվի թանկացման թեմային և նախ նշել, որ ապրանքատեսակի «դեֆիցիտն արհեստական է» և « խոսում է տվյալ շուկայում առկա աննորմալ իրավիճակի մասին», «ՏՄՊՊ-ից ձայն ծպտուն չկա», ապա եզրակացրել, որ «տարին անցկացրեցինք գերշահութային թալանի կիզակետում»: «Հայկական ժամանակը» նույն թեմայի շուրջ դիտարկումներ է առաջարկել «Շարունակիր ժպտալ» հրապարակման մեջ` հընթացս նշելով, թե «այս տարի ևս ՀՀ վարչապետ Տիգրան Սարգսյանը այդպես էլ ամփոփիչ ասուլիս չհրավիրեց»: Թերթը նաև անդրադարձել է ՀՀ աշխատանքի և սոցիալական հարցերի նախարարության սոցիալական ապահովության պետական ծառայության աշխատակիցների բողոքի ակցիաներին, որոնք հետևել են «վճարումների ծառայության» լուծարման վերաբերյալ կառավարության որոշմանը («Բա շուտ ասեիր»), նախագահական նստավայրի դիմաց այսօր անցկացվելիք բողոքի ցույցին` ընդդեմ «Լեզվի մասին» և «Հանրակրթության մասին» օրենքներում փոփոխությունների իրականացման («Որ տեսակից է Սերժ Սարգսյանը»), ինչպես նաև պարբերականի 8-րդ էջի «անխոնջ ուստա Հրանտի» դատողություններին:
