Հայաստանի Հանրապետության Կառավարություն

«Ազգի» թղթակիցը Ստեփանակերտից հաղորդում է, որ «ԼՂՀ վարչապետ Արա Հարությունյանը բացել է հատուկ բլոգ (govnkr.livejournal.com) և պատրաստակամություն հայտնել արձագանքելու բոլոր արժեքավոր դիտարկումներին ու գաղափարներին»։
Լուսաբանելով ԿԲ ներկայացուցչի երեկվա մամուլի ասուլիսը, «Հայաստանի Հանրապետությունը» եզրակացրել է, որ «ԱՊՊԱ գործընթացը ըստ կանխատեսվածի է ընթանում»։ Մինչդեռ «Ժամանակը» նույն ասուլիսի առնչությամբ ցույց է տալիս, թե «որտեղ է թաքնված շան գլուխը». քանի որ ոստիկանությունն է որոշում մեղավորին, ապա անխուսափելիորեն ծագում են կոռուպցիոն ռիսկեր։ Թեմային անդրադարձել են նաև «Առավոտը» («ԱՊՊԱ-ն իրեն չի՞ արդարացնում. 8 օր առաջ վրաերթի ենթարկված տուժած կնոջը մինչ օրս «տիրություն» անող չի եղել ու դեռ մոտ 20 օր էլ չի լինի»), «Երկիրը» («ԱՊՊԱ. բաց նամակ օրենսդրին»)։
«Աղքատացումը՝ գծապատկերով» խորագրի ներքո «Հայկական ժամանակը» տպագրել է «Գների դեմ խաղ չկա» հոդվածը, իսկ «Հրապարակն» անդրադարձել է կառավարության հանձնարարությամբ ԳԱԱ-ում մշակված և պատրաստ լինելուց հետո «առանց որևէ հիմնավորում ներկայացնելու» մերժված «Ջուր» ծրագրին։
Նույն «Հրապարակի» հավաստմամբ հայրենի օրիգարխները, օգտվելով «թարմացված» օրենսդրության ընձեռած հնարավորությունից, սկսել են դատի տալ մամուլին և բարոյական վնասի փոխհատուցում պահանջել»։ Դրա նպատակը «թերթը սնանկացնելով, ազատ խոսքը լռեցնելն է»։ ԵՄԱ նախագահ Բորիս Նավասարդյանն էլ, խոսելով հայկական հեռուստատեսության խնդիրների մասին, «Ժամանակի» թղթակցին ասել է, որ մոտակա ընտրություններից առաջ իշխանություններին շատ կարևոր է ազդակ ուղարկել հասարակությանը, որ բոլորը, ովքեր չեն համաձայնում վերահսկվել, համակերպվել՝ կպատժվեն»։