հինգշաբթի, 20 հունվարի 2011
«Ես քո համեստ ջանին մեռնեմ»
«Եթե Հրանտ Բագրատյանը չուզի, այո, կուզեմ» «Հրապարակի» «Ուզում եք կրկին վարչապե՞տ դառնալ» հարցին հուզիչ անկեղծությամբ պատասխանել է Արամ Զ.Սարգսյանը։ Մինչդեռ «Սոցիոմետր» կենտրոնի ուսումնասիրության արդյունքներով մեր երկրի ազդեցիկ մարդկանց եռյակը հետևյալ տեսքն ունի՝ Սերժ Սարգսյան, Գագիկ Ծառուկյան, Տիգրան Սարգսյան («Հայաստանի Հանրապետություն»-«Քաղաքական ո՞ր գործիչներն են ազդեցիկ», «168 ժամ»-«Ազդեցիկներն ըստ Ադիբեկյանի», «Առավոտ»-«Ամենաազդեցիկը Սերժ Սարգսյանն է», «Նովոյե վրեմյա»-«Ինձ ճանաչում է ամեն մի բոմժ, փողոցում մոտենում են և ասում՝ «դու լավ տղա ես», «Կապիտալ»-«Հայաստանի զորեղները»)։ Ադիբեկյանը նաև կանխատեսել է հանրահավաքային տենդով բռնված Տիգրան Կարապետյանի ապագան. «... մեկ տարի անց արդեն նշյալ քաղաքական գործիչը այլևս չի հիշվելու»։ Ի հեճուկս սոցիոլոգի ԱԼՄ-ի տնօրենն օր-օրի ավելի ազդեցիկ է դառնում՝ վերջնագիր ներկայացնելով իշխանությանը («Ազգ»)։
«Երկիրը» ճիշտ չի համարում, որ Հայաստանի առաջատար բուհերի խորհրդի նախագահ են դարձել երկրի ղեկավարները. «Կոռուպցիային պատերազմ հայտարարած վարչապե՞տն էլ է ճիշտ համարում իր հայտնվելը հայկական պետական մանկավարժական համալսարանի խորհրդի նախագահի աթոռին»։ Այնինչ Ռուսաստանում այդպես չէ, ամեն բան «ողջամտության սահմաններում է» («Հայկական տարբերակ»)։
«Ժամանակը» անդրադարձել է կառավարության նախորդ նիստում հաստատված ՓՄՁ պետական աջակցության ծրագրին՝ «Վարչապետի 70 տոկոսանոց հարվածը փոքր բիզնեսին», իսկ «Ազգը»՝ փողոցային առևտրականների խնդիրներին՝ «Քաղաքապետ, մի ստիպիր ինձ դառնալ հանցագործ»։
Անկեղծությունն իբրև մարդկային հատկանիշ բարձր է գնահատում նաև «Հայկական ժամանակը»։ Թերթի կարծիքով այդ հատկանիշով օժտված է նաև գյուղատնտեսության նորանշանակ նախարարը։ Նա ՕԵԿ-ին իր անդամակցելը բացատրել է հետևյալ կերպ. «Ինքներդ գիտեք, որ նախարարի պաշտոնը քաղաքական է»։ «Կապիտալը» շեշտել է, որ նախարարը կարևորում է գյուղացիական տնտեսությունների խոշորացման անհրաժեշտությունը։
