Հայաստանի Հանրապետության Կառավարություն

Մայրաքաղաքի մի քանի տոնավաճառների աշխատակիցների բողոքի ակցիաները բեռնափոխադրման ծառայության թանկացման առիթով շարունակել են մնալ լրատվամիջոցների ուշադրության կենտրոնում: «Երկիրը» Տրանսպորտի և կապի նախարար Մանուկ Վարդանյանի և տոնավաճառների մի քանի աշխատողների հանդիպման մանրամասները ներկայացրել է «Առևտրական քաշքշուկներ» հրապարակման մեջ: «Հայոց աշխարհը» հարցրել է` «մաքսատո՞ւրքն է բարձրացել, թե՞ ոմանց ախորժակներն են «բացվել», նաև փորձել պարզել, թե «ինչ կա առևտրականների բողոքի տակ»: «Հրապարակի» փոխանցմամբ Տրանսպորտի և կապի նախարարը քաղաքացիներին վստահեցրել է, որ «պետությունը վճարների թանկացում չի արել» («Մաքսատուրքը մասնավորն է բարձրացրել»)
«Առավոտը» փորձել է թանկացման պատճառները վերլուծել ու բնորոշել բեռնափոխադրող երկու ընկերությունների («Յունիտրանս», «Ապավեն») ղեկավարների միջնորդությամբ:
«Ժամանակի» տեղեկացմամբ երեկ ՀՀ վարչապետ Տիգրան Սարգսյանի մոտ տեղի ունեցած խորհրդակցության ժամանակ ներկայացվել է գյուղացիական տնտեսությունների խոշորացման հայեցակարգի նախագիծը, ինչը թերթը որակել է «գյուղատնտեսության մոնոպոլիզացիա կամ օլիգոպոլիզացիա»: Մի այլ հրապարակման մեջ թերթը դիմել է վարչապետին, թե` «ԱԺ հանրապետական պատգամավոր Հերմինե Նաղդալյանին պատկանող խանութներում առհասարակ կտրոնններ չեն տրամադրում»: «168 ժամը» գրել է, թե Շվեցարիայի Դավոս քաղաքում ընթացող 41-րդ համաշխարհային տնտեսական համաժողովին Հայաստանը որևէ կերպ չի մասնակցում և եզրակացրել. «Հայաստանը ոչնչով հետաքրքիր չէ աշխարհին (այն, ինչ կարող էր հետաքրքրություն ներկայացնել, Ռուսաստանն արդեն վերցրել է)»:
«Ո՞նց եք գազը թանկացնելու», հռետորաբար հարցրել է «Հայկական ժամանակը», փորձել ապացուցել, որ իրականում «Հայաստանում գազի սակագինը ամենաբարձրերից է աշխարհում» (132 հազար դրամ կամ ավելի քան 360 դոլար) և հավանական համարել, որ «գազի սակագնի վերանայման հարց, համենայն դեպս մոտ ապագայում» չի առաջադրվի: «Հրապարակը» անդրադարձել է նախորդ տարվա բյուջեով նախատեսված եկամուտների հավաքագրման արդյունքներին, խոշոր հարկատուների հարկային պարտավորությունների կատարման ցուցանիշներին և հանգել տխուր եզրակացության. «Խոշոր էլ չեն, մի բան էլ չեն»: