Հայաստանի Հանրապետության Կառավարություն

ՀՀ կառավարության նիստում քննարկված մի շարք հարցերին արձագանքել են գրեթե բոլոր լրատվամիջոցները. «Բարձրացնելով կառավարման արդյունավետությունը» և «Թոշակները ժամանակին, առանց հերթերի» («Հայաստանի Հանրապետություն»), «Վարչարարությունը կթեթևացնեն» («Առավոտ»)։ «Կապիտալն» անդրադարձել է Տրանսպորտի և կապի նախարարության ներկայացրած երկաթուղային նախագծին («Վանաձոր-Ֆիոլետովոն կկառուցվի. մնում է փողը գտնել»)։ Մի այլ հրապարակման մեջ թերթը նշել է կառավարության շենքի առջև Աշխատանքի և սոցիալական հարցերի նախարարի մի, պարբերականի բնութագրմամբ, «սենսացիոն հայտարարությունը», թե՝ «Վերևներն այլևս 200 դրամներ չեն պահանջի»։
Հունվար ամսվա թոշակների ուշացման պատճառներին անդրադարձել են «Ազգը» և «Հրապարակը», որը նաև ներկայացրել է կառավարության նիստում նախարարի հավաստիացումները, որ շուտով կկարգավորվեն թոշակների ժամանակին տրամադրման, ինչպես նաև «սոցիալական ապահովության պետական ծառայության «վճարումների ծառայության» աշխատակիցների խնդիրները»։
«Իրավունքը» հարցրել է՝ «Հետաքրքիր է՝ Խաչիկյանը դեռ Հայաստանո՞ւմ է»։
«Հայկական ժամանակը» շարունակել է քննության առնել նախորդ տարվա 2,6 տոկոս տնտեսական աճը «Ճգնաժամային համարվող 2009-ի համեմատ» և դարձյալ լուսավոր ոչինչ չի գտել («Մեր չախմախ լոկոմոտիվը»)։ «Հայոց աշխարհը» (նաև «Կապիտալը») տեղեկացրել է, որ ՀԴՄ շահումներն ստանալու ժամկետը երկարաձգվել է մինչև փետրվարի 5-ը։
«Դե ֆակտո իրատեսի» և «Ազգի» տեղեկացմամբ երեկ «Իրատես դե ֆակտո» ակումբում ԱԺ պատգամավոր Արմեն Մարտիրոսյանը ոչ միայն ներկայացրել է «ներքաղաքական խմորումների թեման», այլև, մինչ այդ, «հրել վարչապետի ուղղությամբ՝ գյուղատնտեսությունը գերակա ոլորտ հայտարարելու առթիվ՝ նշելով, թե իբր այդ ոլորտը ևս կհայտնվի «խոշորների ձեռքում» և մենաշնորհային կդառնա։