Հայաստանի Հանրապետության Կառավարություն

Մինչ մամուլը տագնապ է հնչեցնում աննախադեպ գնաճի վերաբերյալ («Հայկական ժամանակ»` «Սանձարձակ գներ», «Ժամանակ»` «Յո՞ երթաս, գնաճ»), իսկ երկրի պատկան մարմինները և լուսավոր ուղեղները ելք են որոնում ստեղծված դրությունից, խնդիրը մեկ` առանձին վերցված Սյունիքի մարզում, ըստ «Առավոտի» («Կրպակների անորոշ ճակատագիրը) և «Հրապարակի» («Դեղերից հետո ձեթը կլինի»), լուծել է մարզպետ Սուրեն Խաչատրյանը` դեղերի վաճառքով զբաղվող կապանցի գործարարներին առաջարկելով առաջիկա մեկ շաբաթում դեղերի գներն իջեցնել 10 տոկոսով: Հընթացս զսպվել է նաև հացի թանկացումը: Ասում են` հերթը ձեթինն է, և այսպես շարունակ...
«Արդար Հայաստան» նախաձեռնող խումբը «Առավոտում» տարածք է վարձակալել և տպագրել ՀՀ նախագահին ուղղված բաց նամակ, որի իմաստն այն է, որ «մեր «հարազատ» կոալիցիոն կառավարությունն ամեն ինչ անում է ժողովրդի վիճակը էլ ավելի ծանրացնելու համար»:
«Կապիտալի» դիտարկմամբ կառավարությունը ծրագրում էր, որ հարկեր/ՀՆԱ հարաբերակցությունը 2010թ. պետք է կազմի 21 տոկոս, այնինչ իրականում այդ ցուցանիշը կազմել է ընդամենը 20 տոկոս («Տեխնիկական վրիպա՞կ, թե՞ միտումնավոր սխալ. բյուջեն կատարվել է ծախսերի զգալի թերակատարումով»): Զարգացման հայկական գործակալության գլխավոր տնօրենը «Ռեսպուբլիկա Արմենիայի» էջերում տրտնջում է, որ կառավարությունն անցած սեպտեմբերին որոշել է վեց միլիոն դրամ տրամադրել «Հայկական պանիր» ընկերությանը և չի տրամադրել: Ձախողվել է նաև ոչխարաբուծության ծրագիրը: Եթե ղեկավարությունը չբավարարվի գործակալության աշխատանքով, ապա տնօրենը պատրաստ է խնդրի լուծման տարբերակներին:
«Ժամանակի» վկայակոչած տվյալների համաձայն «Հայաստանում ինտերնետից օգտվում է բնակչության յոթ տոկոսը», ուստի թերթը տեղին չի համարում ՀՀ վարչապետի այն պնդումը, թե 2010թ. հաջողություն է արձանագրվել ՏՏ ոլորտում: