շաբաթ, 5 փետրվարի 2011
Բանկերի «բարգավաճումը» և լրատվամիջոցների զարմանքը
«Կապիտալի» մեկնությամբ կառավարության և Կենտրոնական բանկի կանխատեսումներն «այս տարվա տնտեսական աճի մասով գրեթե նույնն են». ըստ թերթի «ԿԲ-ն շինարարությունում աճ է արձանագրել», մինչդեռ «ԱՎԾ-ն դա չի նկատել», ինչը, ամենայն հավանականությամբ, «պայմանավորված է տարբեր մեթոդաբանության կիրառմամբ»: «Ազգը», բանկերի պարտադիր պահուստավորման նորմատիվների փոփոխման վերաբերյալ ԿԲ խորհրդի նախօրեին կայացրած որոշմանն անդրադառնալով, գրել է, որ այն կհանգեցնի դրամի հետագա արժևորման, նաև «ոչ մի ազդեցություն չի գործի» բանկերում գտնվող քաղաքացիների ավանդների «տոկոսների վրա»: «168 ժամը» ըստ ԿԲ կանխատեսումների փորձել է պատասխանել հարցին, թե «ինչ է սպասվում մեզ այս տարի». կբարձրանան նավթամթերքի, արդյունաբերական և թանկարժեք մետաղների գները, չափավոր աճ կունենան հացահատիկի գինը և այլն: Մի այլ հրապարակման մեջ թերթը ձկնաբուծարաններում ջրաչափերի տեղադրման նախաձեռնությանը փորձել է հակադրել ձկնաբուծությամբ զբաղվող «գործարարներից շատերի մտավախությունը», թե «նպատակը այս ոլորտը մենաշնորհային դարձնելն է»: «Երկիրը» գրել է, որ հայաստանյան բանկերը «բարգավաճում են` անկախ ամեն ինչից», նաև հիշեցրել, որ մի ժամանակ «բանկերի գործունեության վերաբերյալ ամփոփագրերում արտարժույթի առուծախի գործառնություններից ստացված եկամուտներն արտացոլվում էին առանձին տողով», և «հաշվետվողականության այդ ձևը դոլարայնացման բարձր մակարդակ ունեցող երկրներում «առավել համահունչ էր իրավիճակին»: Մի այլ հրապարակման մեջ թերթը «շահերի լուռ բախում է» որակել այն, որ «կառավարության գործունեության մասին հայրենի գործարարները լռում են» և «որևէ կերպ չեն արձագանքում»:
«Հայոց աշխարհը» անդրադարձել է նախօրեին կառավարության կողմից Մաքսային օրենսգրքում փոփոխություն կատարելու վերաբերյալ ԱԺ տնտեսական հարցերի հանձնաժողովի առաջարկի մերժմանը, այդ առումով խորհրդարանական տարբեր խմբակցությունների տեսակետներին և հընթացս հարցրել. «Այսպե՞ս ենք խրախուսում տեղական արտադրությունը»: «Ժամանակի» աղբյուրները հայտնել են, թե իբր «Հրանտ Վարդանյանի հարաբերությունները ՀՀ վարչապետ Տիգրան Սարգսյանի և ՊԵԿ-ի պետ Գագիկ Խաչատրյանի հետ շարունակում են լարված մնալ», և դա գործարարին ստիպել է «Վրաստանում կատարած... ներդրումը ավելացնել մի քանի անգամ»:
