Հայաստանի Հանրապետության Կառավարություն

Թեման շարունակվում է, ինչին նպաստել է ՀՀ էկոնոմիկայի նախարարի անդրադարձը: Տիգրան Դավթյանը բացատրում է, թե ինչու է հայկական կապիտալը «հոսում» դեպի հարևան երկիր` մեր շուկան արդեն նեղ է գալիս նրա համար: Այս միտքը նույնպես մամուլը միանշանակ չի ընդունում: Ահա վերնագրերը` «Դրդում են և հանգստանում» («168 ժամ»), «Էկոնոմիկայի նախարարը դրական տեղաշարժ է տեսնում, իսկ թվերը բոլորովին այլ բան են ասում» («Կապիտալ»), «Իսկ ինչո՞ւ պետք է վրացական պետհամարանիշները գերադասելի լինեին», «Եվ կրկին ավարտված ճգնաժամի հեքիաթը» («Իրավունք»): Իսկ ահա Վրաստանում վերջին տարիներին գործարարությամբ զբաղվող մեկն այցելում է «Հրապարակի» խմբագրություն և նորովի բացատրում իրավիճակը: Նրա կարծիքով «Վրաստանի և Հայաստանի` խոշոր բիզնեսի համար առկա պայմանները գրեթե չեն տարբերվում», և վրացիներն իրականում «փափախով են զբաղված: Նրանք չեն սիրում աշխատել, սիրում են էսօրվա օրով ապրել»: Հիասթափված գործարարը կասեցրել է իր բիզնեսը Վրաստանում և վերադարձել «հայրենի երկիր»:
«Գոլոս Արմենիին» դրվատում է կառավարության 2011թ. գործունեության ծրագիրը, սակայն միաժամանակ գտնում, որ տնտեսական քաղաքականության «չորս անիծյալ հարցերը» մնացել են անպատասխան: Դրանք են` այսօրվա Հայաստանին պե՞տք է արդյոք ըստ էության «անվճար» սեփականաշնորհման «վերջին ռաունդը», ո՞ւմ է պատկանում բնության կապալը: Երրորդ և չորրորդ խնդիրներն են հակամենաշնորհային կարգավորումը և ագրարային ոլորտը:
«Կապիտալը» գրել է, որ նավթամթերքի տեղափոխման Թավրիզ-Երևան խողովակաշարը, որի կառուցման միջոցների վերաբերյալ պայմանավորվածությունները «թե´ հայկական, թե´ իրանական կողմը չեն պարզաբանում», շահագործման կարող է հանձնվել 2014 թվին, Իրանը պատրաստ է «օրական 1.5 մլն լիտր հեղուկ վառելիք առաքել Հայաստան», նաև հավելել, թե դեռևս պարզ չէ` որքանով էժան կլինի իրանական բենզինը և «ինչ գնով կվաճառվի վերջնական սպառողին»: «Հայկական ժամանակը» թեման տեղափոխել է «խողովակներից անդին» և նշել, թե այն «խորհրդավորության քող ունի իր վրա», և խողովակաշարը եթե կառուցվի, ապա «այնպես պետք է արվի, որ ոմանց ստվերային եկամուտները... գոնե չնվազեն»:
«Ժամանակը» առողջապահության ոլորտում համավճարի սկզբունքի ներդրումը որակել է «փուչիկ» և փորձել համոզել, թե իբր «քոռ գրոշ չարժե» առողջապահության նախարարության պետական առողջապահության գործակալության պետի` «նախօրեի ասուլիսային պնդումն առ այն», որ «համավճարի նոր կարգի ներդրմամբ» պատերազմ է հայտարարվում «բուժծառայությունների դիմաց ստվերային վճարմանը»: «Գոլոս Արմենիի» հետ զրույցում ՀՀ առողջապահության նախարարի տեղակալ Սերգեյ Խաչատրյանը մասնավորապես նշել է, որ «պետությունը պետք է կարգավորի դեղերի գները», նաև մտահոգություն հայտնել «կեղծ դեղերի» բացահայտման ուղղությամբ աշխատանքների ընթացակարգերի վերաբերյալ: