երեքշաբթի, 1 մարտի 2011
Գարնան առաջին օրը...
«Հայաստանի Հանրապետությունը» հրապարակել է ՀՀ վարչապետ Տիգրան Սարգսյանի` հեռուստաընկերություններին տված հարցազրույցի տեքստը: Պատասխանելով հասարակությանը հուզող բազմաթիվ խնդրահարույց հարցերի, վարչապետը վստահեցրել է, որ իրականացվող բարեփոխումների դրական դինամիկան զգալու է երկրի յուրաքանչյուր քաղաքացի: Տնտեսական կյանքի մի կարևոր իրադարձություն ևս` Ծաղկաձորում մեկնարկած «Կամուրջ» համաժողովը, այս և այլ թերթերի ուշադրության կենտրոնում են. տնտեսության համար պատասխանատուները փորձում են հստակեցնել հետճգնաժամային մակրոտնտեսական կայունության ուղիները, դիմակայել նոր մարտահրավերները, որոնցից ամենալուրջը, թերևս, գնաճն է:
Գործադիրը փորձում է խրախուսել օբյեկտիվ քննադատությունը, որը ոչ միայն ուժեղացնում է իշխանությանը, այլև օգնում բացահայտել հասարակությունում առկա լրջագույն խնդիրները:
ՀՀ վարչապետի հարցազրույցին անդրադարձել են նաև «Իրավունքը» («Մեկ է` թանկացումների մեղավորները մոնոպոլիաներն են»), ըստ որի «գնաճն իրոք Հայաստանի բնակչությանը հուզող հիմնական խնդիրներից մեկն է», «Հայկական ժամանակը» («Ապրիլմեկյան շաբաթ»), որը ի մասնավորի արտառոց է համարել արտագաղթի դինամիկայի նվազման մասին վարչապետի դիտարկումը, և «Ժամանակը»:
«Կապիտալը» փոխանցել է լրագրողների հետ երեկվա հանդիպման ժամանակ Հրանտ Բագրատյանի ներկայացրած դիտարկումները, թե ինչպես պետք է զսպել գնաճը, նաև խոստովանությունը, ըստ որի, թերթի վկայությամբ` «ժամանակին իր արածի 70%-ը սխալ է եղել»: «Հրապարակը» Հ.Բագրատյանի ասուլիսին անդրադարձել է «Գլխիդ ձուն գա» հրապարակմամբ, «168 ժամը»` հավելել նախկին վարչապետի հայտարարությունը, որ «մենք պատմական օրեր ենք ապրում»` նկատի ունենալով «ընդհանրապես ընդդիմության ողջ պայքարը»: Մի այլ հրապարակման մեջ թերթը անդրադարձել է օրերս Ծաղկաձորում կազմակերպված «Կամուրջ» միջազգային տնտեսական համաժողովում Էկոնոմիկայի նախարար Տիգրան Դավթյանի հայտարարությանը, որ ներկայումս մշակվում է արտահանմանն ուղղված արդյունաբերության զարգացման հայեցակարգ, և փորձել հեգնել, թե իբր էկոնոմիկայի «նախկին ու ներկա նախարարին» բնորոշ են «հայեցակարգ» բառի նկատմամբ ունեցած սերը»:
«Հայոց աշխարհի» հետ զրույցում Գյուղատնտեսության նախարար Սերգո Կարապետյանը նշել է, որ առաջիկայում ԱԱԽ-ը կավարտի Հայաստանի պարենային անվտանգության ապահովման հայեցակարգի մշակումը:
Հայաստանում էներգաարդյունաբերության ծրագրերի կիրառման և վերկանագնվող էներգետիկայի ապագայի հիմնախնդիրներին անդրադարձլ են «Կապիտալը» և «Ազգը»: «Երկիրը» արձանագրել է, որ «երեկ մեկնարկած ԱԺ հերթական քառօրյան» սկսել է միջադեպով, քանի որ` «Ժառանգությունը լքել է դահլիճը». «Առավոտը» հավելել է, որ «Ժառանգությունը» բոյկոտում է այս քառօրյան»: «Ժամանակը» տեղեկացրել է, թե «մրցավար դառնալու Տիգրան Կարապետյանի երազանքը» կատարվել է, և երեկվա հանրահավաքում վերջինս «կարմիր քարտ» է ցույց տվել իշխանություններին:
