ուրբաթ, 11 մարտի 2011
«Էժան կտամ, լավը կտամ...»
Մանրածախ գների վերին շեմ սահմանելու կառավարության երեկվա օրենսդրական նախաձեռնությունը, ինչպես և սպասվում էր, մեծ արձագանք է ստացել մամուլում` «Կառավարությունն արդեն կարող է մանրածախ գների վերին շեմ սահմանել» («Հայաստանի Հանրապետություն»), «Կառավարությունը կմիջամտի գներին» («Ազգ»), «Ֆիքսել գնե՞րը, թե՞ խթանել մրցակցությունը. կառավարությունը գերադասեց վարչական միջամտությունը» («Կապիտալ»), «Լավ է ուշ, քան երբեք», «Կմիջամտեն» («Երկիր»), «Թանկացումների դեմ պայքարի իմիտացիա՞» («Իրավունք»), «Դեֆոլտի՞ եք պատրաստվում» («Հայկական ժամանակ»), «Պոպուլիզմի գործիքները» («Ժամանակ»), «Գտան գնաճը զսպելու ճանապարհը» («Առավոտ»): Այս թերթը կարծիք հայտնելու խնդրանքով դիմել է նաև ՀԿԿ ԿԿ առաջին քարտուղար Ռուբեն Թովմասյանին, որը կառավարությանն «ուղարկում է» գների պետական կոմիտեի խորհրդային ժամանակները («Կառավարության հերթական PR-ը»):
Երկրում ստեղծված սոցիալական վիճակը խիստ մռայլ գույներով են ներկայացնում «Ժամանակը» («Էլ տրանսֆերտներն էլ չեն փրկի») և «ՀԺ»-ն («Սերժից մերժվածները»): «Դելովոյ էքսպրեսում» ընդարձակ հարցազրույցով հանդես եկած Էդվարդ Սանդոյանի կարծիքով էլ «Մենք պետք է կենտրոնացնենք մեր բոլոր ուժերը, որպեսզի դուրս գանք ինստիտուցիոնալ թակարդից»: «Մի խումբ օլիգարխներ և Հանրապետական պատգամավորներ Սերժ Սարգսյանին իբր փորձել են համոզել, որ ճիշտ կլինի պաշտոնանկ անել Տիգրան Սարգսյանին», որին կարող է փոխարինել Երևանի քաղաքապետը («ՀԺ»): «Առավոտը» փոխանցում է Արտաշես Շահբազյանի այն տարտամ ու անորոշ միտքը, թե «դաշնակցությունը քննարկում է կառավարության նկատմամբ վերաբերմունքի հարցը»:
