չորեքշաբթի, 16 մարտի 2011
Գնաճի զսպման գործողությունները...
«Ազգի» կարծիքով մանրածախ գների վերին շեմ սահմանելու իրավունք նախատեսող օրենսդրական փոփոխություններին հավանություն տալու որոշմամբ կառավարությունն իրեն օժտել է աննախադեպ լիազորությամբ, և թեև «դեռևս անհայտ է գործնական նշանակությունը», սակայն «իրական է հոգեբանական կանխարգելիչ ազդեցությունը»: «Կապիտալը» հավելել է, թե իբր գնաճը կառավարելի մակարդակի բերելու շտապողականությունը դրդել է ապրանքների գների պետական կարգավորումը «գրեթե ամբողջովին իրականացնել ռուսական օրինակով», առանց հաշվի առնելու երկու երկրների «սպառողների պահանջարկի առանձնահատկությունները» («Էկոնոմիկայի նախարարությունը արտատպե՞լ է ռուսական օրենքը»): «Առավոտում» նախկին արտգործնախարար Վարդան Օսկանյանը ազդարարել է, որ «գնաճը հետևանք է», հետո նշել, որ «Փակուղուց դուրս գալու համար պետք է իրականացնել 4 անհետաձգելի գործողություն»:
«Իշխանությունը փորձում է ակտիվ քայլերով շտկել վիճակը», գրել է «Հայոց աշխարհը»` անդրադառնալով նախորդ շաբաթվա վերջին կազմակերպված խորհրդակցությունում ՀՀ նախագահ Սերժ Սարգսյանի հանձնարարականներին: «Երկիրը», հակառակը, կարծիք է հայտնել, թե իբր դրանցով «նախագահն անուղղակիորեն ընդունում է կառավարության անարդյունավետ գործունեությունը» գյուղատնտեսության ոլորտում:
«Հայկական ժամանակը» կարծիք է հայտնել, որ ֆոնդային բորսայում դրամի վերջին օրերի արժեզրկումը պայմանավորված է ԿԲ-ին ուղղված ՀՀ նախագահ Սերժ Սարգսյանի հրահանգով և որպես այդպիսին նկատի է ունեցել իր մոտ հրավիրած խորհրդակցության ժամանակ երկրի առաջին դեմքի դիտարկումը, որ «դրամի արժևորումը տնտեսության և ներքին արտադրողի համար անբարենպաստ երևույթ է, և... այդպիսի երևույթները տևական ժամանակ խանգարել են»:
«Ժամանակը» գրել է, թե «ՀԴՄ կտրոն պահանջողների թիվն իրականում նվազում է», նաև փորձել ապացուցել, թե իբր «կառավարության «ՀԴՄ կտրոնների լոտո» նախաձեռնությունը տապալվել է»:
«Կապիտալի» փոխանցմամբ օրեր առաջ Հալիձոր-Տաթև ավտոճանապարհի մի հատվածում տեղի ունեցած փլուզումը «ցույց է տվել», որ ժամանակին «ֆինանսների նախարարությունը իսկապես ճիշտ էր, և այդտեղ հողային աշխատանքների մասով եղել են լուրջ չարաշահումներ»: «Ազգը» ներկայացրել է ՀՀ ազգային մրցունակության հիմնադրամի ղեկավար Բեկոր Փափազյանի հայտարարությունը, որ զբոսաշրջության կենտրոն համարվող Տաթևին հարակից «Սվարանց համայնքում երկաթի հանքի... շահագործման լիցենզիաների տրամադրումը խրախուսելի չէ»:
