Հայաստանի Հանրապետության Կառավարություն

Եթե այո, ապա «Հայկական ժամանակի» նման դուք էլ կլսեիք, թե ինչպես են «անսպասելիորեն թափ առել ՀՀ վարչապետ Տիգրան Սարգսյանի մոտալուտ պաշտոնանկության խոսակցությունները»: Այսքանն ասելուց հետո թերթին ընդամենը մնում է հիմնավորել այդ «ինքնատիպ» միտքը: Դա էլ դժվար չէ: Պարզվում է` վարչապետի «բրյուսելյան շրջագայությունը բացարձակապես ոչ մի արդյունք չի տվել», և այցից հետո նրա արած «հիացական հայտարարությունները» սեփական դիրքն ամրացնելու փորձ են: Տիգրան Սարգսյանի «բրյուսելյան» մեկ այլ միտք` «Մեզ հաջողվել է Հայաստանում հիմնել ուժեղ և անկախ օմբուդսմենի ինստիտուտ», մեջբերում է «Երկիրը»` հավելելով, որ Րաֆֆի Հովհաննիսյանի վրանի վերաբերմամբ «ոստիկանության կեցվածքը ամենաուղղակի կերպով արտացոլում է, թե պետությունը որքան լուրջ է վերաբերվում օմբուդսմենի ինստիտուտին»:
«Իշխանը կաշառակեր չէ, Սպարտակն էլ` զրպարտիչ»,- առաջին էջում ազդարարում է «Առավոտը»` հիշեցնելով ՎՊ նախագահի և Անանիա Շիրակացի համալսարանի սեփականատիրոջ դատավարությունը, որն, ի դեպ, ավարտվել է հաշտության համաձայնությամբ: Թեմային անդրադառնում է նաև «Հայկական ժամանակը», որի «Խաչիկյանը վերջապես խոսեց» հրապարակման մեջ նախկին պաշտոնյան հերքում է իր ղեկավարած ծառայությանը ներկայացված մեղադրանքների զգալի մասը. «Նույնիսկ հնարավոր է, որ կարկառուն այս հանրապետականին ապագայում մեկ այլ պաշտոն բաժին հանեն»:
«Հրապարակը» ՀՀ արդարադատության նախարարին դիմել է մի քանի հարցով և ստացել համարժեք պատասխաններ` «Ես Փաշինյանի փոստատարը չեմ»: Այս թերթը շարունակել է նաև Նավասարդ սրբազանի «Բենթլիի» թեման և վկայակոչելով հոգևորականի «մտերիմ ընկերներից մեկի» ասածը` փոխանցել Սրբազանի «օրիգինալ բացատրությունը» մարմնական սիրուց և «կյանքի բոլոր բարիքներից» օգտվելու իրավունքի մասին: «Ժամանակը» զրուցել է Լևոն Թոքմաջյանի հետ, ով հաստատել է, որ ինքը 15 տարի առաջ Մեսրոպ Մաշտոցի քանդակն ստեղծել է «Նավասարդ արքեպիսկոպոս Կճոյանի կերպարանքով»:
«Ձեռնարկություններին տրված պետական վարկային միջոցները արդարացված են», եզրակացրել է «Հայաստանի Հանրապետությունը», անդրադառնալով «Էլեկտրոսարք» և «Քրաուն Քեմիքլ» ընկերություններ Էկոնոմիկայի նախարար Տիգրան Դավթյանի այցելության մանրամասներին ու ներկայացնելով ձեռնարկությունների վերջին տարիների աշխատանքը: «Առավոտը» տեղեկացրել է «Մասնագիտական կրթության որակի ապահովման ազգային կենտրոն» հիմնադրամի հոգաբարձուների խորհրդի նիստի մասին:
«Կապիալի» փոխանցմամբ «փոքր և միջին բիզնեսը չի ամրապնդվում արտաքին շուկայում» և, ըստ պաշտոնական վիճակագրության, «հունվարին աճել է միայն խոշորների արտահանումը»: «Հայոց աշխարհը» հավելել է, որ «տարեսկզբին... արձանագրված տնտեսական ակտիվության աճը խոշոր հարկ վճարողների գործունեության վրա» ունեցել է այն ազդեցությունը, որ «նվազել են նրանց հասույթները», իր հերթին «սպառման կրճատումը սկսել է հարվածել խոշորներին»: «Հրապարակը» նախ նշել է, թե «և´ գնաճն է ավելացել, և´ փողն է թանկացել», ապա նախորդ շաբաթվա ընթացքում «իրենց կողմից արտարժույթի շուկայում» կատարած 12 մլն ԱՄՆ դոլարի վաճառքի մասին ԿԲ մամլո ծառայության հաղորդագրությունը համարել «առնվազն տարօրինակ տեղեկատվություն» այն առումով, որ վերջերս «ՀՀ նախագահը ԿԲ-ին հրահանգել էր այլևս չվարել դրամի կուրսն արժևորելու սխալ քաղաքականություն»: «Հանգիստ թողեք դրամը», իր հանգույն խորհուրդ է տվել «Ժամանակը» հավելելով, թե «դրամի արժեզրկումից անհանգստանալ այնքան էլ պետք չէ, հատկապես որ դա ուղղակիորեն խթանում է արտահանման ոլորտը»:
«Հայկական ժամանակի» տեղեկացմամբ կառավարության առաջիկա նիստում որոշում կընդունվի «Սևանի ափին 1.3 հեկտար տարածք տրամադրել` ... առագաստային սպորտի զարգացման նպատակով», ինչը սակայն, ըստ թերթի, դառնալու է «հերթական օբյեկտ...էլիտայի» համար: Մի այլ հրապարակման մեջ պարբերականն արձագանքել է Արագածոտնի մարզի Ավան համայնք ՀՀ վարչապետ Տիգրան Սարգսյանի և գյուղնախարար Սերգո Կարապետյանի այցելությանը և կարծիք հայտնել, թե իբր «գյուղացուն մենակ չթողնելու օպերացիան...զուտ ցուցադրական բնույթ է կրում» և հետապնդում է լոկ «ստեղծված իրավիճակը... լիցքաթափելու նպատակ»:
«Իրավունք-հետաքննությունը» «Ինչպես են թալանում մարզերում» հրապարակման մեջ անդրադարձել է Արագածոտնի մարզում 2008-10թթ. ՎՊ հայտնաբերած «բազմապիսի աղաղակող չարաշահումներին»: «Կապիտալը» կարևորել է «կարճաժամկետից դեպի երկարաժամկետ» ռազմավարության անցումը և դա համարել «ներդրումային մարտահրավեր»` հիմնախնդրի լուծման ուղղությամբ գործընթացների նախաձեռնումը վերապահելով պետությանը: