Հայաստանի Հանրապետության Կառավարություն

«Հրապարակը» խիստ ինքնատիպ է համարում ապրիլի 7-ի առթիվ վարչապետի երեկվա շնորհավորանքը` հավաստելով, որ «ֆեյսբուքում» «հաճելիորեն քննարկվում էր կանանց ուղղված այդչափ նուրբ մեծարումը»:
Սակայն նրբությունը սրանով ավարտվում է, և լրատվամիջոցները ձեռնամուխ են լինում ինչպես կառավարության նիստի, այնպես էլ մնացած հարցերի քննարկմանը: Նույն «Հրապարակը» անդրադառնում է գյուղնախարարի տեղակալների ազատում-նշանակումներին` հատկապես զարմանալով երիտասարդ Ռոբերտ Մովսիսյանի «վագրային թռիչքով»` «ՈւԽ ՀՀԿ-ական նախագահին նշանակել են գյուղփոխնախարար»: Լուրերի տեսքով այդ և մի քանի այլ օրակարգային հարցեր են արծարծում «Դելովոյ էքսպրեսը» և «Հայկական ժամանակը»: Վերջինս ենթադրում է, որ նիստում «պաշտոնապես հաստատվեցին Երվանդ Զախարյանի գլխին սև ամպեր կուտակվելու լուրերը»` նկատի ունենալով վարչապետի ներածական խոսքում նշված կոռուպցիոն ռիսկեր պարունակող ոլորտները:
«Կապիտալը» («Նվազագույն աշխատավարձը չի բարձրանա. կառավարությունը դեմ է պատգամավորների առաջարկին») և «Ժամանակը» («Նվազագույնների» կառավարությունը») շարադրում են ՀՅԴ խմբակցության օրենսդրական նախաձեռնությունը մերժելու շարժառիթները: «Կապիտալը» նաև փոխանցում է Լյուդմիլա Սարգսյան-Արտակ Զաքարյան երեկվա բանավեճի մանրամասները. «ՀՀԿ-ում վարչապետի հրաժարականի հարց չի քննարկվում», «Կառավարությունն իր առջև դրված և իր ստանձնած պարտավորությունները արդյունավետ է իրականացնում» (Ա.Զաքարյան): Նույն թերթը «Էժան վարկ` հողի մշակին. կսուբսիդավորվեն նաև անապահով ֆերմերները» վերնագրով հրապարակմամբ լուսաբանել է ֆինանսների նախարարի երեկվա ճեպազրույցը, իսկ «Ազգը» պարզաբանել ավտոմեքենաների տեխզննման նոր կարգը, որով «կվերանա անօրինական 5 հազար դրամների վճարման հնարավորությունը»:
«Հայոց աշխարհը» («Հանձնաժողովը կուսումնասիրի շաքարավազի շուկան») և «Կապիտալը» («Ծուռ հայելիների շուկա. շաքարի միջազային գինն իջել է, Հայաստանում` բարձրացել») ներկայացնում են հայկական շուկայի ազգային առանձնահատկությունները:
«ՀԺ»-ն վերհիշում և ընթերցողին հիշեցնում է վարչապետի ավելի քան երկու տարվա վաղեմություն ունեցող մամուլի ասուլիսը և համադրում այսօրվա իրողությունների հետ:
«Հայոց աշխարհի» հետ զրույցում Վարդան Բոստանջյանը, անդրադառնալով գյուղացիական տնտեսություններին ցածր տոկոսադրույքներով վարկ տրամադրելու խնդրին, նախ կարծիք է հայտնել, թե «տարեկան 14%-ով տրամադրվող ու 4%-ով սուբսիդավորվող վարկերը անտանելի ծանր բեռ են մեր անչափ թույլ գյուղացիական տնտեսությունների համար», ապա հավելել, որ պետության մեծ աջակցությունը կլինի «նախորդ տարվա կրկնակի գնով ստացվելիք բերքն իրացնելու պատասխանատվությունը» ստանձնելը: «Իրավունքում» ԱԺ պատգամավորը հայտարարել է, թե «տարբեր տրամաչափի չինովնիկներ առավոտից երեկո մտածում են, թե ինչպես կարելի է ուրիշի հաշվին ճոխ ապրել», «բիզնեսը Հայաստանում ճնշման տակ է և լճացում է ապրում» և այլն: Թերթը արձագանքել է նաև օրեր առաջ կայացած Արծվիկ Մինասյանի, բանկերի միության նախագահ Աշոտ Օսիկյանի և Բագրատ Ասատրյանի` լրագրողների հետ հանդիպմանը («Հայաստանի գյուղատնտեսության «բազարի» առանձնահատկությունները):
«Իրատես դե ֆակտոյի» «Երբ արձագանքողը թեժ գիծն է» հոդվածում հեղինակը գրել է, որ այս ծառայության միջոցով «կառավարության օղակներով անցած դիմումներն արագ պատասխան են ստանում», նաև հավելել, որ հաճախ խնդիրների լուծման պատասխանատուները «կառավարական հանձնարարությունը ստանալուց հետո» են միայն անցնում «իրենց ամենօրյա աշխատանքային պարտականությունների» կատարմանը: