Հայաստանի Հանրապետության Կառավարություն

«168 ժամը» ազդարարում է «Դրամի «վախճանը». «Երեկ առավել ակնառու կերպով դրսևորվեց այն, ինչի մասին շաբաթներ առաջ իր մոտ տեղի ունեցած խորհրդակցության ժամանակ ասում էր Հայաստանի նախագահ Սերժ Սարգսյանը. դրամն արժեզրկվեց»: Թերթը փորձում է պարզաբանել դրա պատճառը և կանխատեսել հետագան:
«Կապիտալը» ՀՀ նախագահի երեկվա հանդիպումը գործարարների հետ լուսաբանում է «Նոր հիմնվող արտադրությունների բեռը կթեթևացվի. նախագահը ինովացիան մղում է առաջին պլան» վերնագրով, իսկ «Հայկական ժամանակը» դեմ է տնտեսության զարգացման համար արտոնություն տալուն ու աջակցելուն. «Պետք է ընդամենը չխանգարել և ապահովել գործունեության հավասար դաշտ բոլորի համար»,- խրատում է թերթը: «Ժամանակն» էլ վերհիշում է, թե ինչպես տարիներ առաջ «մեր ԿԲ-ն իր ոսկու ողջ պահուստը վաճառեց մեկ տրոյական ունցիան 395 ԱՄՆ դոլար գնով», մինչդեռ երեկ միջազգային շուկաներում այդ գինը կազմել է 1467.4 ԱՄՆ դոլար` «Դոլարների հետ խաղացող վարչապետը»:
Ինչպես միշտ հարուստ է գյուղատնտեսական հրապարակումների «տեսականին»: «Գոլոս Արմենիին» ոչ միայն անդրադառնում է ոլորտի հրատապ խնդիրներին` «Գյուղվարկերի «ականապատ դաշտը», այլև գյուղատնտեսությունը ներկա փակուղային վիճակից հանելը համարում երկրի գլխավոր անելիքը` «Հացի գինը և ընտանիքի գնողունակությունը»: Մեկ այլ նյութի հեղինակ մեկնել է Ախթալա, եղել Ս.Տեր-Պողոսյանի երբեմնի ձեռնարկություններում, զրուցել բնակիչների հետ և համոզվել, որ հանուն հանապազօրյա հացի ախթալացիները պատրաստ են արդարացնել ցանկացած արատ: «Կապիտալն» իր հերթին ուսումնասիրել է գյուղնախարարության գործունեության 2010թ. արդյունքները և հետաքրքիր փաստեր բացահայտել` «Որտե՞ղ են շեշտակի աճ ապահոված ոչխարները. գյուղնախարարությունը մասնավորի գործերն իրեն է վերագրել»:
«Հայոց աշխարհը» գոհունակությամբ է ընդունել ինքնակամ շինություններին վերաբերող կառավարության վերջին որոշումը` հույս ունենալով, որ «Կոռուպցիոն ռիսկերը կտրուկ կնվազեն»: