շաբաթ, 23 ապրիլի 2011
«Տառապանքս փորձ ունի...»
Հայաստանաբնակ հայերիս 34 տոկոսի համար այս երկրում ապրելը «հավասարազոր է տառապանքի» («168 ժամ»), «54 տոկոսը պայքարում է «գոյատևման համար» («Ազգ»): Այս տվյալները վերցված են «Gallup»-ի հետազոտությունից, որի նպատակն է եղել պարզել, թե աշխարհի 124 երկրներում ինչպես են իրենց կյանքը գնահատում քաղաքացիները և ինչ են ակնկալում առաջիկա հինգ տարիների ընթացքում: «Տառապողներից» են նաև Աֆղանստանի, Եգիպտոսի և Եմենի բնակիչները: Տնտեսագետներ Արա Նռանյանին և Թաթուլ Մանասերյանին այլ զգացում` զայրույթն է համակել, երբ նրանք ծանոթացել են ԱՎԾ հրապարակած ցուցանիշներին` «Հեքիաթասաց ԱՎԾ-ն էլի արջի ծառայություն է մատուցել իշխանություններին» («Հրապարակ»): «Գոլոս Արմենիին» արծարծում է հայ-վրացական «եղբայրական» և «բարեկամական» անվանվող, բայց իրականում կնճռոտ հարաբերությունները, որոնք բնորոշ են նաև բիզնեսի ոլորտին` «Եղբայրական «փայը»:
Լավ բաներ էլ կան: Միջազգային մեկ այլ զեկույցում, որն արտացոլում է ՏՏՀ ոլորտում ստեղծված իրավիճակը, Հայաստանն հայտնվել է Զամբիային, Մոզամբիկին և այլնին հաջորդող երկրների ցուցակում, ինչի պատճառը ըստ «Կապիտալի» հնացած` 2009թ. տվյալներն են, որոնք ոչ մի կերպ չեն արտացոլում ներկան: «Աքիլես» ՀԿ ղեկավարի կարծիքով կառավարության ձեռնարկած վերջին միջոցները «Վարորդների կյանքը թեթևացրել են» («Երկիր»): «Ազգի» վկայությամբ ՀՀ ԱԺ նախագահը Facebook-ի իր էջում պատասխանել է վարչապետին:
