չորեքշաբթի, 4 մայիսի 2011
Իրականը և վիրտուալը
Այսօրվա մամուլը վարչապետի մասին տեղեկացնում է, որ
- Տիգրան Սարգսյանն ինտերնետ օգտագործող ամենաակտիվ քաղաքական գործիչներից է, ունի իր անձնական բլոգն ու էջը` Facebook-ում, այժմ էլ իր պաշտոնական կայքէջն է բացել («Երկիր»),
- երեկ նա ընդունել է «Հազարամյակի մարտահրավեր» կորպորացիայի գլխավոր գործադիր տնօրենին` «Մարտահրավեր վարչապետին» («Հայկական ժամանակ»),
- ռեստորաններում իրեն «համեստ դրսևորողներից» է («Երկիր»),
- ըստ քաղաքագետ Արմեն Աղայանի կանխատեսման «Սերժ Սարգսյանին փոխարինելու կարող է գալ Տիգրան Սարգսյանը» («Կապիտալ», «Առավոտ»):
Վերահսկիչ պալատի նախագահի մասնակցությամբ ՀՀ էկոնոմիկայի նախարարությունում տեղի ունեցած խորհրդակցության առիթով «Առավոտը» ՀՀ վարչապետին է վերագրել այդ նախարարության ղեկավարի պաշտոնը, չնայած Տիգրան Սարգսյանը երբեք էկոնոմիկայի նախարար չի եղել: ՎՊ բացահայտումները ներկայացվել են «Ո՞ւր են գնում պետական փողերը» («Իրավունք»), «Ինչպե՞ս լափել միլիոն» («Ժամանակ») վերնագրերով: «Հայոց աշխարհի» տեղեկացմամբ ՎՊ հերթական թիրախը լինելու է «Մեկ ազգ, մեկ մշակույթ» հիմնադրամը:
«Կապիտալը» տնտեսական թեմաներ է շոշափել «Ճանապարհաշինությունը` ՀԲ-ի դիտակետում. Հայաստանում մրցույթները շահում են բացառապես պետական ընկերությունները», «Հրամայված է ակտիվացնել. վիճակագիրները բանկերում անկում են նկատել», «Կովկասում և Կենտրոնական Ասիայում գնաճի ավելացում. երկարաձգե՞լ, թե՞ կանխել» հոդվածներում, իսկ «Ռեսպուբլիկա Արմենիան» անդրադարձել է ապրիլի վերջին Թբիլիսիում տեղի ունեցած հայ-վրացական «սիրողական» գործարար համաժողովին` «Սեփական բիզնեսը ոչ թե տեղափոխել, այլ ընդլայնել»:
«Հայկական ժամանակը» ականատես է եղել, թե ինչպես կենսաթոշակների վճարման այս ամսվա գործընթացը քաշքշուկով է սկսվել («Փնթի կառավարման պարզ օրինակ»), նաև բացահայտել «Հայաստանում արդեն երկրորդ տարին արձանագրվող շատ բարձր գնաճի պատճառը» («Ստվեր` կյանքից երկար»):
«Առավոտը» տեղեկացնում է, որ այսօր Մինասի որմնանկարները «Զվարթնոց» տեղափոխելը մտադիր են խոչընդոտել քաղաքի մտավորականները:
