ուրբաթ, 6 մայիսի 2011
«Լավ» և «վատ» լուրերի հերթականությունը
«Առավոտի» նամակագիրը, նկարագրելով նոտարիատում տիրող վիճակը և բանավիճելով նույն թերթում տպագրված «նախկին նոտարի» հետ, հավաստում է. «Հայաստանում է, որ կնիք խփելու այդ մեկ րոպեանոց արհեստը կեղտոտ բիզնեսի է վերածված: Ճիշտ է վարվում վարչապետը, որ փոփոխություններ է առաջարկում»: Իսկ ահա «գլխավոր մարքսիստը» դժգոհ է վարչապետից և մասնավորապես ԵՊՀ ուսանողների հետ հանդիպման ժամանակ նրա արտահայտած մտքերից: Ի դեպ, դրանցից մեջբերումներ է անում «Իրավունքը». «Հիմնականում պաշտոնների ձգտումը մեծ է այն մարդկանց մոտ, ովքեր գիտելիք չունեն», «Ինչքան շատ ենք խոսում կոռուպցիայի մասին, էնքան կոռուպցիան շատանում է»:
Մամուլի ուշադրությանն են արժանացել կառավարության երեկվա նիստի մի շարք որոշումներ («Առավոտ», «Հայկական ժամանակ»): Հոդվածներ են նվիրվել բանկերի գործունեությանը («Կապիտալ», «Հայոց աշխարհ»), Գիերմո Տոլոսայի հայտարարություններին, արտաքին ներդրումների շեշտակի անկմանը և դրա պատճառներին («Դելովոյ էքսպրես»), խոշորագույն հարկատուների ցանկի վերլուծությանը` «Զանգեզուրի ՊՄԿ-ն» հետ է նվաճում առաջատարի դիրքը» («Կապիտալ»), ՀՀ կառավարության գործունեության քառամյա ծրագրի իբր ձախողմանը` «100 քայլ առաջ, 3 տարի հետ» («Հայկական ժամանակ»), աննախադեպ գնաճի ցուցանիշներին` «Ժողովուրդը` աղքատ, օլիգարխները` չաղ ու բախտավոր» («Իրավունք»):
«Առավոտի» կարծիքով ՀՀ նախագահի երեկվա այն հայտարարությունը, թե ինքը վարչապետին հանձնարարել է անձամբ զբաղվել ագրովերամշակման ոլորտի խնդիրներով և արդյունքն ամփոփել աշնանը, նպատակ ուներ «փակել վարչապետի մայիսի վերջին սպասվելիք հնարավոր պաշտոնանկության բոլոր խոսակցությունները»:
