Հայաստանի Հանրապետության Կառավարություն

Երեկվա կառավարության նիստում քննարկված տարաբնույթ հարցերին և ընդունված որոշումներին լրատվամիջոցներն անդրադարձել են ջանասիրաբար: «Հայաստանի Հանրապետությունը» ներկայացրել է ՀՀ կառավարության տեղեկատվության և հասարակայնության հետ կապերի վարչության տրամադրած նիստի ամփոփ տեղեկատվությունը: Մի այլ հրապարակման մեջ թերթը նաև արձանագրել է, որ համապատասխան որոշմամբ այսուհետև «սերմի ու պարարտանյութի իրացումը կազատվի ավելացրած արժեքի հարկից» և «անշարժ գույքի չափագրումը կմասնավորեցվի»:
Ահա մյուս հրապարակումների վերնագրերը. «Բարձր տեխնոլոգիա` ընդդեմ դարի հիվանդության. կստեղծվի ճառագայթային բժշկության համալիր» («Կապիտալ»), «9 ամսվա փոխարեն` 15-20 օրում հնարավոր կլինի փոխել հողամասերի նշանակությունը» («Ազգ»): «Առավոտը» և «168 ժամը» փոխանցել են կառավարության նիստից հետո լրագրողների հետ ճեպազրույցում Գյուղատնտեսության նախարար Սերգո Կարապետյանի վստահեցումը, որ «այս տարի պտղի ու մասնավորապես ծիրանի միջին բերք ենք ունենալու»:
«Տնտեսական ակտիվության 7.7 տոկոս աճ», տեղեկացրել է «Ազգը»` ներկայացնելով ՀՀ ԱՎԾ կողմից ներկայացրած օպերատիվ տվյալները: Թեմային անդրադարձել են նաև «Կապիտալը» («Ապրիլին տնտեսությունը իրեն վատ չի զգացել, մինչդեռ վաստակների աճը զիջում է գնաճին»), «168 ժամը» («Անբովանդակ ակտիվություն»), և «Հայկական ժամանակը» («Այս ինչ նկար է»):
2007-2009թթ. մշակված և 2010թ. հունվար ամսին կառավարության կողմից հաստատված երկհատոր Կարմիր գրքի շնորհանդեսից մանրամասներ են հաղորդել «Հայաստանի հանրապետությունը» («Կարմիր գիրք` «նոր հերոսներով». Հայաստանը կենսաբազմազանության կիզակետ է»), «Երկիրը» («Կարմիր գիրքը նոր բնակիչներ ունի») և «Հրապարակը» («Անկախության առաջին Կարմիր գիրքը»), որը մի այլ հրապարակման մեջ ներկայացրել է նաև իր «սեփական պարզաբանումը», թե իբր «Տիգրան Սարգսյանի կառավարությունում ամենից շատ նեղսրտում են դաշնակցականների քննադատությունից»:
«Կապիտալը» գրել է, որ ըստ ՊԵԿ-ի տվյալների մարտ ամսին հարկատուներն ավելացրել են մուծումները», և վերջիններիս կողմից վճարված հարկերն ու այլ պարտադիր վճարումները կազմել են մարտին «հավաքագրված հարկային եկամուտների 60.1%-ը»: