ուրբաթ, 3 հունիսի 2011
Պատկերավոր մտածողության օրինակներ
Առաջին օրինակը, ըստ «Դե ֆակտո իրատեսի», տվել է ԱԺ խոսնակի... ռեֆերենտը, ով իր գրած տեքստում ներկայացրել է ճառ ասելու փոխարեն զանգ կախելու` հայ դասական գրականությունից հայտնի պատկերը: Նույն թերթում պրոֆեսոր Թ. Մանասերյանն այն պատկերավոր միտքն է արծարծել, թե «Հայաստանին առաջարկվում են տնտեսության առողջացման «ժամկետանց դեղեր», ուստի «անհրաժեշտություն է առաջացել հրավիրելու տեղական մասնագետների տնտեսագիտական կոնսիլիում, որը սթափ կգնահատի իրավիճակն ու կփորձի գտնել ելքն իրավիճակից»: Պրոֆեսորն այնուամենայնիվ նկատել է, որ 2011թվականը «խոստանում է լինել տնտեսական առողջության վերականգնման մեկնակետ»:
Կադրային հարցը հանգիստ չի տալիս «Հրապարակին» և «Հայկական ժամանակին»: Առաջինի պնդմամբ «կտրուկ փոփոխություններ են սպասվում այս ամսին», երբ խորհրդարանական ընտրության ՀՀԿ ցուցակը կգլխավորի Տիգրան Սարգսյանը, «ում այնուամենայնիվ կփոխարինի Հովիկ Աբրահամյանը, ով լավ վարչարարի համարում ունի»: Եվ այլն: «ՀԺ»-ն էլ լսել է, թե իբր «անցյալ հինգշաբթի օրը» ՀՀԿ գործադիր մարմնի նիստում «նախատեսված է եղել քննարկել Տիգրան Սարգսյանի պաշտոնանկության հարցը», բայց այդպես էլ չի քննարկվել: Սույն թերթի հաջորդ էջի ընթերցողը կարող է տեղեկանալ, որ «Իրան-Հայաստան երկաթուղի» անունը կրող «ծրագիրը» սիրուն սուտ է»:
Ստվար մամուլ են «հավաքել» կառավարության երեկվա նիստից առաջ քննարկված թեմաները. «Կրկնակի ֆինանսավորում խորհրդատվական ծրագրերի համար, որոնց անհրաժեշտությունը չի եղել» («Ազգ»), «ՀԲ վարկերն է՞լ են կերել» («Առավոտ»), «Ինչպես են մսխել վարկային միջոցները» («ՀԺ»), «Նաիրիտին» անհրաժեշտ են 400-500 մլն դոլար ներդրումներ» («Ազգ»), «Նաիրիտի» նոր զարգացման ծրագիրն արդեն պատրաստ է» («ՀՀ»), «Ուզում են փրկե՞լ «Նաիրիտը» («Երկիր»), «Նաիրիտը» կփրկե՞ն» («Առավոտ»), «Փնտրվում է փրկիչ» («Կապիտալ»), «Կոլապսից դուրս կգա՞ արդյոք «Նաիրիտը» («Հրապարակ»), «Նաիրիտը» վախճանվում է» («Ժամանակ»), «Վարչապետը կրկին անդրադարձավ նոտարական ծառայությունների սակագնային միջանցքին» («Ազգ», «ՀՀ»), «Նոտարական սակագները բարձրացե՞լ են» («Առավոտ»), «Նույն օրը բնակարանը վաճառվել է հինգ անգամ` նոտարների հաստատմամբ» («Իրավունք»):
