Հայաստանի Հանրապետության Կառավարություն

«Փաստորեն մնաց»,- զարմանում է «Երկիրը»` ՀՀԿ «իր աղբյուրներից» տեղեկանալով, որ «առնվազն մինչև 2012թ. նոր խորհրդարանի ձևավորումը Տիգրան Սարգսյանը կշարունակի գլխավորել կառավարությունը»: Երեկ վարչապետն ընդունել է «Փոքր Մհեր» կրթահամալիրի սաների շքերթը` «Հայկազունները` հայրենիքի ապագա պաշտպաններ» («Հայաստանի Հանրապետություն»), «Փոքր Մհերը» արագ է մեծանում» («Հայացք»): Միջոցառումը լուսաբանել է նաև «Հրապարակը»` կասկածելով կրթահամալիրի առաքելությանը և չհասկանալով դրա ստեղծման նպատակը: Իսկ ահա սննդի անվտանգության պետական ծառայության նորանշանակ պետի «կերպարը» թերթին լիովին հասկանալի է` «Վարչապետի կադրը մոդիֆիկացված սննդի արդյունքն է»: Պաշտոնյայի մամուլի ասուլիսի առնչությամբ «Կապիտալն» արձանագրում է նրա հետևյալ միտքը. «Մսավաճառ կրպակները փակվել են օրենքով»: Նույն թերթը օրենքի խախտում է նկատել Հայաստանի ազգային մրցունակության հիմնադրամի տնօրենի` «Հայաստանի ամենաբարձր վարձատրվող պաշտոնյայի», նշանակման հրամանում: «168 ժամի» համար տարբերություն չկա, թե ով է գլխավորում սույն հիմնադրամը, քանի որ դրա գործունեությունը «վաղուց արդեն ձևական բնույթ է կրում»: «Հայացքը» իր հերթին պարզել է, որ նախկին տնօրենի հրաժարականի և Սվարանց գյուղի հանքավայրի միջև «ուղիղ կապ կա»:
«Հայկական ժամանակը» և պարզապես «Ժամանակը» տոգորված են «հերթական մարտի 3-ի» սպասումով, երբ դրամը «մեկ գիշերում կտրուկ արժեզրկվեց»: Նման սցենարի կրկնությունը չի բացառում «Գառնի ինվեստ» ունիվերսալ վարկային կազմակերպության տնօրեն Բագրատ Ասատրյանը:
Կառավարության նախորդ նիստի հետահայաց արձագանքները տեղ են գտել «Ազգի» («Պարզաբանում արդարադատության նախարարությունից») և «168 ժամի» («Հրապարակեք ամբողջ ցուցակը») հոդվածներում: Այս վերջին թերթը փոխանցում է «շատերի» այն ընկալումը, թե սոցապ նախարարությունում կատարված անարդյունավետ ծախսերի քննությունը կառավարության կողմից «ակնարկ ու թաքուն սպառնալիք» է` ուղղված ՀՅԴ-ին: Նշված տարիների նախարարի խոսքով` «Վարչապետն իր նախարարին հանձնարարական է տվել, նա էլ կատարել և զեկուցել է»: