Հայաստանի Հանրապետության Կառավարություն

Օրվա մամուլը հետևողականորեն լուսաբանել է երեկվա կառավարության նիստը. «Բուհերի պատվերով տեղերը կավելացվեն» և «Գորիսը զբոսաշրջության կենտրոն` հին քաղաքով, ժայռափոր համալիրներով, քերծերով» («Հայաստանի Հանրապետություն»), «Խրախուսում ազգային բանակում ծառայած ուսանողներին» («Ազգ»), «Պետպատվերով ուսման տեղեր կավելացվեն բանակից զորացրվածների համար» («Հայացք»), «Զորացրվածներին անվճար» («168 ժամ»), «Պոպոլիստակա՞ն» («Հայկական ժամանակ»): Առանձնակի հետաքրքրությամբ լրատվամիջոցներն անդրադարձել են նիստի ընթացքում «Նաիրիտի» շուրջ ծավալված քննարկմանը, որն ընթանում էր հընթացս նախագահական նստավայրի մոտ հավաքված գործարանի աշխատակիցների մի մասի դժգոհության արտահայտման և որի պատճառը, «Ազգի» տեղեկացմամբ, «դարձյալ աշխատավարձի պարտքերն էին»: «Ծուխն առանց կրակի չի լինում» գրել է «Կապիտալը» և հավելել իր կարծիքը, թե «Նաիրիտի» շուրջ հարցերը շարունակում են անպատասխան մնալ»: Անդրադառնալով թեմային «Հայացքը» նշել է. «Նաիրիտի» աշխատակիցները բողոքում են, վարչապետը` հորդորում թափանցիկ աշխատել»: «Հրապարակը» (նաև «Հայկական ժամանակը») տեղեկացրել է, թե չնայած հայտարարությանը, որ «կառավարության նիստից հետո տեղի կունենա Էներգետիկայի և բնական պաշարների նախարար Արմեն Մովսիսյանի ասուլիսը, այն այդպես էլ տեղի չի ունեցել, «Երկիրը» հարցրել` «Բա ո՞ւր մնաց թափանցիկությունը»:
«Կապիտալի» հետ զրույցում Ագրարագյուղացիական միության նախագահ Հրաչ Բերբերյանն անդրադարձել է գյուղատնտեսության հիմնահարցերին և կարծիք հայտնել, թե «Այս տարի գները հավանաբար կիջնեն»: «168 ժամը» մռայլ կանխատեսում է կատարել, թե գյուղատնտեսության զարգացմանն ուղղված քայլերը «դժվար թե էական դեր խաղան ոլորտը ոտքի կանգնեցնելու համար», նաև փորձել գյուղացիներին վարկերի տրամադրման հիմնախնդիրները օղակել-կապել գալիք ընտրությունների ու... «ընտրակաշառքի» հետ»: Գյուղոլորտի հիմնախնդիրներին անդրադարձել են նաև «Երկիրը» («Ամեն խաղ խաղացել էին, հիմա էլ...»), «Առավոտը» («Կարկուտը սնանկացրել է շիրակցիներին»), «Հայաստանի հանրապետությունը» (:Գները չեն նվազում կարկուտի պատճառով, խաղող մթերողները վերջապես մարել են գյուղացիների անցած տարվա պարտքը»):
«Առավոտը» հրապարակել է «Հայելի» ակումբում ՀՅԴ-ական խորհրդարանական Արծվիկ Մինասյանի գնահատականները կառավարության գործունեության վերաբերյալ», «168 ժամը» ( նաև «Հայկական ժամանակը») փոխանցել Էկոնոմիկայի նախարար Տիգրան Դավթյանի հայտարարությունը, որ «Doing business-2012»-ում Հայաստանն իր դիրքը կբարելավի 5-6 կետով և իր հանգույն որակել` «Ամեն ինչ` հանուն ցուցանիշի»: