հինգշաբթի, 16 հունիսի 2011
Քննադատության գինը
«Հայաստանի Հանրապետությունը» անդրադարձել է ՀՀ պետական խորհրդանիշների օրվա կապակցությամբ Երևանում կազմակերպված միջոցառումներին նշելով, որ դրանք նաև «ազգային համերաշխության ու ազգային հզորության յուրօրինակ դրսևորում էին»: «Հրապարակի» արձագանքը խորհրդանշական օրվան ու անցկացված միջոցառումներին չափազանց հոռետեսական է. թերթը նախ զարմանք է հայտնել, որ հանդիսավոր երթը առաջնորդել են Հայաստանի «իրական պարծանք Լևոն Արոնյանն» ու Նազիկ Ավդալյանը, փոխանցել այս օրերին Լոնդոնում գտնվող ՀՀ վարչապետ Տիգրան Սարգսյանի շնորհավորական ուղերձը տոնական օրվա առիթով, հետո էլ եզրակացրել, թե իբր «Պետությունը կործանում են, սիմվոլները` փառաբանում»: Մեծ Բրիտանիա վարչապետ Տիգրան Սարգսյանի աշխատանքային այցին անդրադառնալով, «Հայկական ժամանակը» ի մասնավորի նշել է հայ գործարարների հետ վարչապետի հանդիպման մասին, մի այլ հրապարակման մեջ փոխանցել նաև BBC-ին տված հարցազրույցում Տիգրան Սարգսյանի հայտարարությունը «Լեռնային Ղարաբաղի շուրջ համաձայնություն ձեռք բերելու» վերաբերյալ: Կառավարության ղեկավարի այցին անդրադարձել են նաև «Ժամանակը» («Փրկօղա՞կ, թե՞ Բերմուդյան եռնակյունի») և «168 ժամը» («Իմիջդ օրհնյալ լինի»): «Կապիտալը» տեղեկացրել է, որ երեկ Էներգետիկայի և բնական պաշարների նախարարությունը Նաիրիտ գործարանի կառավարման օպերատորի ընտրության «հետաքրքրությունների հայտերի» ներկայացման վերջնաժամկետը երկարացրել է մինչև հունիսի վերջը, և որ ըստ նախարարության լրատվական ծառայության` «գալիք շաբաթ նախարարը «Նաիրիտի» թեմայով ասուլիս կհրավիրի»: Թեմային անդրադարձել է նաև «Հայկական ժամանակը»` «Անհետաքրքիր «Նաիրիտ»:
Նախօրեին լրագրողների հետ հանդիպման ժամանակ ԿԲ նախագահ Արթուր Ջավադյանի կողմից արված հայտարարությունները «Ժամանակին» դրդել են խորհրդածելու, թե բարձրաստիճան պաշտոնյան «ինչ էր իրականում ուզում հասկացնել»: «168 ժամը» կարծիք է հայտնել, թե իբր «Արթուր Ջավադյանի... ասուլիսից պարզ երևաց, որ մեր իշխանություններն այնքան էլ անկեղծ չեն, երբ ասում են, որ ցանկանում են գյուղացուն օգնել», և ճգնել է ապացուցել սույն «վարկածը»: Մի այլ հրապարակման մեջ թերթը ուշադրության է հրավիրել հանցավորության աճի վերաբերյալ վիճակագրական տվյալները:
«Առավոտում» Ագրարագյուղացիական միավորման նախագահ Հրաչ Բերբերյանն անդրադարձել է գյուղացիական տնտեսությունների վարկավորման աջակցման պետական ծրագրին և հայտարարել, թե «զարմացած է բանկերի խարդախություններից», «այդպես էլ չի հասկանում, թե ՀԲ և IFAD-ի գումարները ինչ ճարպկությամբ բանկերը յուրացրին»: «Հայոց աշխարհը» նշել է, թե «Հայկական ապրանքը դուրս է մղվում վրացական շուկայից», «Երկիրը» փոխանցել է Հայաստանի բուհերի արհեստակցական կազմակերպությունների ճյուղային հանրապետական միության նախագահ Գագիկ Վաղարշակյանի կարծիքը, թե «ՀԱՄԿ-ի նախագահը սպառել է իրեն», նաև անդրադարձը արհմիության հիմնախնդիրներին:
