Հայաստանի Հանրապետության Կառավարություն

Տնտեսական ակտիվության մայիսյան 9.9 տոկոս աճը «Կապիտալին» և «Հայկական ժամանակին» դրդել է օգտագործել նույն արտահայտչամիջոցը` «Կովկասյան վագրը վերադառնում է»: Թերևս, մեկնաբանությունն է տարբեր: Ավելի հեռուն են գնացել «Ժամանակը», ըստ որի «ԱՎԾ-ն չի կարողանում թաքցնել կառավարության քաղաքականության անարդյունավետությունը», «168 ժամը», որը նույնպես արձանագրում է, թե «Թվանկարչությունը կատարելագործվում է», իսկ «Իրավունքը» չի կարողանում թաքցնել զարմանքը` «Էս տնտեսությո՞ւնն ինչու «կատաղեց»: Ակտիվության աճը հանգիստ են ընդունում «Ազգը» («Տնտեսական ակտիվության աճը` 9.9 տոկոս.արտաքին առևտրի բացասական ակտիվությունը խորանում է») և «Հայոց աշխարհը» («Տնտեսական ակտիվությունը խորանում է, մայիսին այն հասավ 9.9 տոկոսի»):
«Կարծում եմ` ամեն ինչ հանգելու է հեղափոխության»,- պատասխանելով «168 ժամի» հարցին խորհում է Հրանտ Բագրատյանը և հընթացս կազմում մինչև օրս երկրի ունեցած 11 կառավարությունների «վարկանիշային աղյուսակը»:
«Հրապարակը» վերստին նայում ու տեսնում է վարչապետի դերակատարությունը «ՀՌԱԿ-ի ու ԱԴՀԿ-ի պառակտման գործում»` զուգահեռաբար մեջբերելով դեռ տարիուկես առաջ նույն մեղադրանքի առթիվ Տիգրան Սարգսյանի հերքումը: Այս անգամ ևս թերթի փորձագետը «ՍԴՀԿ հայաստանյան կառույցի ղեկավարն է»:
«Գոլոս Արմենիին» հոդված է գրել «Վանաձոր-քիմպրոմ» ՓԲԸ խնդիրների մասին, մեկ այլ հոդվածում արձանագրել, որ հիպոտեքային վարկավորումը ավելի ու ավելի անմատչելի է դառնում:
«Առավոտը» ԱԺ արտահերթ նստաշրջանի օրակարգից կարևորել է «աղբահանության և սանիտարական մաքրման մասին հարցը», իսկ «Հրապարակն» առաջին իսկ էջում տեղեկացրել, որ Երևանի գլխավոր ճարտարապետն «իրականացրել է այն առաքելությունը, որի համար նշանակվել էր այս պաշտոնին` անցկացրել է ՀՀ կառավարության շենքի բակում «թմբուկ» կոչվող հերթական այլանդակ կառույցի նախագիծը»: