չորեքշաբթի, 29 հունիսի 2011
Զարմանազան
«Իրավունքի» զարմանքն է հարուցել այն, որ ՀՀ վարչապետը ներողամտությամբ է վերաբերվում Էրեբունու նախկին թաղապետի «միտումնավոր» մոռացկոտությանը. «... մի՞թե Տիգրան Սարգսյանը համարում է, որ իր անունը կամ ազգանունը կարող են չհիշվել, այն էլ` հարազատ ՀՀԿ-ի միջավայրում»: Վարդան Բոստանջյանն էլ համոզված է, որ «ներքաղաքական դաշտում անհերքելի առաջատարները Հանրապետական ու «Բարգավաճ Հայաստան» կուսակցություններն են» և ձախողման են դատապարտված «ամենազանազան հնարամիտների»` երկու կուսակցությունների միջև լարվածություն առաջացնելու ջանքերը: Անդրադառնալով ՀԱԿ-իշխանություն հնարավոր երկխոսությանը ԲՀԿ խորհրդարանական խմբակցության անդամը կարծիք է հայտնել, որ «առավելագույնը, ինչ կարող է անել ՀԱԿ-ը, հրատապություններ մատնանշելը պետք է լինի» («Հայոց աշխարհ»): Այս ձևակերպմանը կտրականապես համաձայն չէ «Հայկական ժամանակի» գլխավոր խմբագիրը, ով ընթերցողին հանգամանորեն պարզաբանում է ՀԱԿ առաջնորդի «իրական քաղաքականության» բուն էությունը` հընթացս պատասխանելով բազմաթիվ «ինչուների»:
Թե´ «ՀԺ»-ն, թե´ «Կապիտալը» արձանագրում են դրամի վերջին օրերի ամրապնդումը, ինչը «ՀԺ»-ի կարծիքով «ծանր ազդեցություն է թողնում մեր տնտեսության վրա», իսկ «Կապիտալի» վարկածով «ուժեղ դրամը չեզոքացնում է արտաքին շուկաներից եկող գնաճային ռիսկերը»: «Ժամանակը» երկրի տնտեսական վիճակը դիտարկում է պատմական ավելի երկար ժամանակամիջոցի համատեքստում` խորանալով մինչև 2003թ.: Սակայն թերթի սկզբնավորման օրից ձևավորված դիրքորոշումը դրանից էապես չի փոխվում` «Հայաստանը վերջին 2-3 տարիներին գնալով հետ է մնում աշխարհից, իսկ կյանքը Հայաստանում էականորեն դժվարանում է (թանկանում է)»:
«ՀԺ»-ն լսել է կառավարության նախորդ նիստում ՀՀ ֆինանսների նախարարի զգուշացումը կառավարության անդամներին, որ ձեռնպահ մնան բյուջեի միջոցներով առանց մրցույթի ապրանք և ծառայություն ձեռք բերելուց և հոդված նվիրել այդ խնդրին` «Ախպերական աղբյուրներ»: «Կապիտալին» մտահոգել է մեկ այլ թեմա` թե ինչպես մեծ էներգածախսի պատճառով փակվել է հայկական ցեմենտի ճանապարհը դեպի արտաքին շուկաներ:
