երեքշաբթի, 26 հուլիսի 2011
«Փորձ մ' ալ փորձիր...»
«Հայկական ժամանակը» «ներիշխանական հակասությունների նորանոր դրսևորումներից» է համարում այն ջանքերը, որ իբր ԱԺ նախագահը գործադրում է «վարչապետ դառնալու ուղղությամբ»: Չնայած Հ.Աբրահամյանը երեկ հերթական անգամ թերթին հավաստիացրել է, որ «վարչապետ դառնալու ցանկություն չունի», «ՀԺ»-ն նախանձելի համառությամբ իրենն է պնդում` հընթացս արծարծելով նաև ՀՀԿ համամասնական ցուցակը գլխավորելու թեման: «Ժամանակը» նույնպես հույժ իրազեկված է և իր ընթերցողին էլ իրազեկում է, որ ՀՀԿ շտաբը գլխավորելու է ԱԺ նախագահը` «2008-ի ընտրության որակի խորհրդանիշներից մեկը» («Հովիկ Աբրահամյանը` Գարիկ Ազարյանի շարունակություն»): Փաստելով, որ «արդեն գրեթե 20 տարվա «ավանդույթ» է` ամենաշատ պալատական ինտրիգները Հայաստանում հյուսվում են վարչապետի պաշտոնի շուրջ», «Առավոտի» գլխավոր խմբագիրը չի դիմանում մի կանխատեսում էլ ինքն անելու գայթակղությունից` «Մեր կառավարությունում որևէ էական բան կփոխվի մինչև խորհրդարանական ընտրությունների ավարտը»:
«Իրավունքի» զարմանքն է հարուցել Օշականի Դպրեվանքում վարչապետի հայտնած այն միտքը, թե «Հայաստանում քննադատության են արժանանում ինտելիգենտ կեցվածք ունեցողները (գիտեն, որ այդ մարդիկ բռի ուժով չեն պատասխանելու, ծեծի չեն ենթարկելու իրենց քննադատողներին)` դա համարելով «խոսքի ազատության վիճակը բնութագրող» խոստովանություն: Այս մտքից մինչև արտագաղթի թեման մեկ քայլ է, և այդ քայլն անում են «Ժամանակը» («Աշխատանք տուր` արտագաղթ տամ») և «Առավոտը» («Կառավարությունը մոռացել է ԿԶԾ սոցիալական գործակցության համաձայնագիրը», ինչը «քաղաքացիական հասարակության և հանրային մասնակցության համար նպաստավոր միջավայրի ստեղծման իմիտացիա է ձևավորում» և ավելի խտացնում «հիասթափության և անվստահության մթնոլորտը` նպաստելով արտագաղթի աճին»):
«Առավոտը» տեղեկություն ունի, որ օրերս վարչապետն հանդիպել է «մի քանի ձեռնարկատերերի հետ, ովքեր բողոքել են իրենց համար ստեղծված պայմաններից, գործարար միջավայրից»: Տիգրան Սարգսյանը խոստացել է «առաջիկայում անդրադառնալ ՓՄՁ հարցերին, ավելին` ձեռնարկատերերի հետ հանդիպման մշտական ֆորմատ ստեղծել»:
«Իրավունքը» կասկածով է վերաբերվում վիճակագրական այն տվյալներին, որոնց համաձայն «Հայաստանում եղել են տնտեսական նկատելի զարգացումներ», քանի որ դրանք չեն հանգեցրել «հավաքվող հարկերի աճի», հետևաբար` «աճել է ստվերը»:
