շաբաթ, 30 հուլիսի 2011
Շատախոսության մարմաջը
«Առավոտը», զարմանալով հանդերձ, որ «վերջին մեկ ամսվա ընթացքում մի շարք չինովնիկներ պարբերաբար ասուլիս են հրավիրում` հանրությանն ապացուցելու, որ մեր երկրից արտագաղթողների թվի մասին խոսակցությունները չափազանցված են», լուսաբանում է Գագիկ Եգանյանի երեկվա հերթական ասուլիսը` «Ապացուցում են, որ կտրուկ չէ»: Թեմային անդրադառնում են նաև «ՀՀ»-ն («Քաղաքական շահարկումներ` ենթադրությունների հիման վրա. վիճակագրությունը չի խոսում զանգվածային արտագաղթի մասին), «Հայոց աշխարհը» («Որոնք են արտագաղթի պատճառները», «ՌԴ վերաբնակեցման ծրագիրը` անցանկալի միգրացիոն հոսք»), «Երկիրը» («Եգանյանն իրեն հակասում է»), «Հայացքը» («Ինքներս մե՞զ խաբենք, կամ` ինչպե՞ս կարելի է արտագաղթը չհամարել զանգվածային»): Բայց պարզվում է, որ սա դեռ քիչ է, դեռ պետք է ԱԺ լսումներ էլ լինեն. մտավորականները մտադիր են այդ հարցով եկող շաբաթ կրկին դիմել խորհրդարան («ՀԺ»):
Տպագիր մամուլը համարժեք պատասխան է տալիս նախկին վարչապետի գետնամած դատողություններին. «Հազարամյակի մարդը, կամ սա անձի մասին անավարտ հոդված է» («ՀՀ»), «Սուտասաններից ամենասուտասանը» («Հայոց աշխարհ»), «Ո՞ւմ մաշիկն է. Հրանտ Բագրատյանը և իր «ձախ չստիկ» դառնալու խելացնոր երազանքը» («Նովոյե վրեմյա»), «Դարձվածքներ» («Երկիր»):
«Հայկական ժամանակը» արձանագրում է դրամի արժևորումը և եզրակացնում, որ ԿԲ-ն դա թույլ է տալիս «Հանուն լֆիկների»: Մեկ այլ հոդվածում` «Չի հիշում ու չի հիշում», թերթը «կոռուպցիոն երևույթներ» է նկատում ՀՀ ԱՎԾ «անհատական բանակցությունների» ճանապարհով 12 հազար հատ պայուսակ գնելու գործարքում, քանի որ ծառայության պաշտոնյաներից չի կարողացել հոդաբաշխ պարզաբանում ստանալ խնդրո առարկայի վերաբերյալ:
