չորեքշաբթի, 3 օգոստոսի 2011
Սակավախոս մամուլի տեղեկացմամբ
ՀՀ վարչապետ Տիգրան Սարգսյանի ԼՂՀ կատարած այցելությանը օրվա մամուլն անդրադարձել է առավելապես նկարագրական բնույթի հրապարակումներով («Վարչապետը «բանակ գնաց» («Առավոտ»), «Միստր վարչապետը 1-ին գծում» («Հայկական ժամանակ»), «Տիգրան Սարգսյանը տանկ է վարում» («Հրապարակ»): Վերջինս, ի դեպ, նախ կարծիք է հայտնել, թե վարչապետի այցը «սահմանափակվել է միայն գյուղատնտեսության խնդիրների նեղ շրջանակում», հետո էլ հավելել, որ տեղի ունեցած խորհրդակցության ժամանակ Տիգրան Սարգսյանը կարևորել է երկրի տնտեսության զարգացման, սոցիալական պաշտպանվածության, ենթակառուցվածքների և ազգային անվտանգության ապահովման հիմնախնդիրների լուծմանն ուղղված գործընթացները:
«Առավոտը» գրել է, թե չնայած դեղերի շուկան ազատականացնելու նպատակով կառավարության կողմից ընդունված որոշումից անցել է 5 ամիս, սակայն «փոփոխություններն առայժմ ի վնաս գործարարների են, դեղերը չեն էժանանում»:
«Ժամանակը» Ծաղկաձորում կայանալիք երիտասարդական խաղերին ՌԴ վարչապետ Վլադիմիր Պուտինին հրավիրելու թեմային անդրադառնալով գրել է, թե իբր «եթե ԲՀԿ երիտասարդներին հաջողվի դա անել», ապա դա կարող է «լուրջ հարված լինել ՀՀԿ երիտասարդներին» և «նաև ՀՀԿ ղեկավարությանը»:
