հինգշաբթի, 4 օգոստոսի 2011
Սրբագրումների ժամանակը
Արձագանքելով ՀԱԿ-ի կազմակերպած հանրահավաքում Լևոն Տեր-Պետրոսյանի ելույթին, «Առավոտը» գրել է, որ այն «միանշանակ չի ընդունվել», «բանավեճի առիթ է տվել», և նա առաջիկայում «ստիպված կլինի պարզաբանումներ տալ» իր ներկա ու նախկին թիմակիցներին:
«Հրապարակը», անդրադառնալով Հայաստանի արդյունաբերողների և գործարարների (գործատուների) միության գործունեությանը, կարծիք է հայտնել, որ կազմակերպությունը, բացի մի քանի բիզնես ֆորումներից, ոչնչով չի զբաղվել, նաև տեղեկացրել, որ Գործատուների հանրապետական միության անդամները համագումար են հրավիրել և նախագահ ընտրել ՀԳՀՄ-ին անդամակցած Գագիկ Մակարյանին:
«Հայոց աշխարհը» լրագրողների հետ կառավարության աշխատակազմի ազգային փոքրամասնությունների և կրոնի հարցերի վարչության պետ Վարդան Ասցատրյանի հանդիպման անդրադարձը հրապարակել է «Արդեն պատրաստ է աղանդավորների ուզած օրինագիծը» խորագրով: Այլ հրապարակումներում թերթը տեղեկացրել է, որ ԿԲ-ը տևական չեզոքությունից հետո «փորձում է մի փոքր թուլացնել դրամը» և «ակտիվացնել միջամտությունը արժութային շուկայում», քննության առել հանրության «միջին խավի» հիմնախնդիրները, շարունակել Հրանտ Բագրատյանի ղեկավարած կառավարության գործունեության ընթացքում տեղի ունեցած ցավալի դեպքերի շարադրանքը, որոնք սկզբնավորեցին «պետական բյուջեի խրոնիկ չկատարման տարիները և վայրենի սեփականաշնորհումը», տարբեր արտադրական սարքավորումների, հոսքագծերի ու հաստոցների չհիմնավորված վաճառքը» և այլն («Երբ գողը գոռում է` բռնեք գողին»):
