ուրբաթ, 5 օգոստոսի 2011
«Մեծամասշտաբ» փոփոխությունների ուրվականը
«ՀԺ»-ի այս անգամ` «լավատեղյակ» աղբյուրները հայտնում են, որ ՀՀ նախագահը այս անգամ` աշնանը կադրային «մեծամասշտաբ» փոփոխություններ է անելու, որոնցից չեն խուսափելու «վարչապետն ու նրա կաբինետը»: «Ժամանակի» աղբյուրներն ըստ երևույթին այնքան էլ լավատեղյակ չեն, որովհետև չեն կարողացել պարզել, թե «Ո՞ր երկրի քաղաքացիներ են վարչապետի ընտանիքի անդամները»:
Շատ ավելի «գլոբալ» հարցեր է արծարծում «Հրապարակը»` սկսած «Երիտասարդ առաջնորդների ամառային դպրոց» ծրագրի մասնակիցների հետ վարչապետի հանդիպումից, Հայաստանի և Իրանի էներգետիկ համագործակցությունից («Էլեկտրաէներգիա արտահանող երկրից դառնում ենք ներմուծո՞ղ երկիր»), վարչապետի կուսակցական գործունեությունից մինչև բարձրաստիճան պաշտոնյաների առողջության վերականգնումը («Մարզպետներն էլ են մարդ և հանգստի կարիք ունեն»):
«Հայոց աշխարհն» իր հերթին ոչ միայն հաջողությամբ ավարտին է հասցրել «Երբ գողը գոռում է` բռնեք գողին» հոդվածը, այլև արձանագրել, որ «Բանկերի վարկային պորտֆելն ավելացել է ևս 100 միլիարդով»:
«ՀԺ»-ի թղթակիցը պարզել է, որ կառավարությունը օրենսդրական հիմք չունի քննարկելու Գավառի քաղաքապետի «հետագա պաշտոնավարման հարցը», ինչի առաջարկով վարչապետին էր դիմել գլխավոր դատախազը:
«Իրավունքի» «Ընկ. Փանջունու անկյունում» ծվարել են սրամիտ և ոչ այնքան սրամիտ մի քանի մանրապատումներ:
