Հայաստանի Հանրապետության Կառավարություն

«Հայաստանի Հանրապետությունը» կառավարության երեկվա նիստի մանրամասները լուսաբանել է «Կատարվել է հանձնարարականների 94,8 տոկոսը», «Կենդանական և բուսական աշխարհին պատճառված վնասի նոր սակագներ» և «Խաղատները և շահումով խաղերը կրթական ու մշակութային օջախներից հեռու» հրապարակումներում, ներկայացրել նիստում ՀՀ վարչապետ Տիգրան Սարգսյանի ներածական խոսքը, որում գործադիրի ղեկավարը բարձր է գնահատել ՀԲ-ի հետ համագործակցությունը և տեղեկացրել, որ Հայաստանին տրամադրվելիք արտոնյալ միջոցներն ավելացել են 55 մլն ԱՄՆ դոլարով, ինչը պայմանավորված է «մեր վարկային պորտֆելի որակով և կառավարման բարձր մակարդակով»։ Թեմային անդրադարձել են նաև «Իրավունքը» («Մնում է ամեն մի վարկից առաջ պարզապես ոմանց բարի ախորժակ մաղթել») և «Հայկական ժամանակը» («Վնասից օգուտ են քաղում»), որ մասնավորապես «քննության է առել» ՀՀ ԿԲ հաշվեկշռում առաջացած վնասի պետբյուջեից փոխհատուցման օրենքով սահմանված կարգը և առաջադրել մի շարք հարցադրումներ։
«Հրապարակի» տեղեկացմամբ կառավարության երեկվա նիստն ուղեկցվել է «մարդկանց ապրելու իրավունքի համար պայքարով» («Կրպակների հարցը կքննի Սահմանդրակա՞նը»). «Առավոտը» շարունակել է կրպակապատումը զարգացնել նոր երանգներով («Պատգամավորը, որ մի քիչ ապրեց տանիքում»), «Հայկական ժամանակը»՝ կոչ արել՝ «Բողոքողներ բոլոր բաներից՝ միացեք»։ Նույն «Հրապարակի» թղթակցի հետ զրույցում ԱԺ պատգամավոր Սամվել Ալեքսանյանը նախ հարցրել է, թե՝ «ես երբ եմ զբաղվում բիզնեսով», ապա հավելել՝ «Իմ խանութում ժամկետանց սնունդ չեն վաճառել»։
«Իրավունքի» հետ զրույցում Պաշտպանության նախկին փոխնախարար Վահան Շիրխանյանը, ՀԱԿ-իշխանություն երկխոսությանն անդրադառնալով, իր բնութագրմամբ՝ «ճգնաժամից դուրս գալու միակ ճանապարհը» համարել է «լիբերալ համակարգից սոցիալ-դեմոկրատականի անցումը»։
«Ազգը» ներկայացրել է ՀՌԱԿ երկու ատենապետերի միջև ստեղծված հակամարտությունը, ինչպես նաև նրացից Էդվարդ Անտինյանի՝ «Հայելի» ակումբում երեկվա հանդիպումը լրագրողների հետ։ «Առավոտը» թեմային արձագանքել է «ՀՌԱԿ ատենապետերը միմյանց մասին» հրապարակմամբ։