շաբաթ, 27 օգոստոսի 2011
Եթե հումոր, ապա...
Քաղաքապետն ինչպես քաղաքապետ դառնալու «սարսափելի երազանք» չի ունեցել, այնպես էլ վարչապետ դառնալ չի ծրագրում` «չկա նման բան», և նման խոսակցություններին էլ հումորով է վերաբերվում. «ՀԺ»-ի հերթական հարցին, թե ճի՞շտ է, որ... եթե,- պատասխանել է Կարեն Կարապետյանը: Դարձյալ ի պատասխան թերթի հարցի քաղաքապետն ասել է, որ «կառավարության գործունեությունը «տարբեր ձևերով» է գնահատում» և չի ճշտել, թե դա ինչ է նշանակում: Այնուհետև համարժեք պատասխան են ստացել մայրաքաղաքի տնտեսությանը և խնդիրներին վերաբերող հարցերը:
«ՀԺ»-ն նաև բացահայտել է, որ «տարիներ շարունակ ՀՀ կառավարությունն իր որոշումները կայացնում է առանց քվեարկության», ուստի դրանք «իրականությանը չհամապատասխանող ակտ են, եթե չկա քվեարկություն, ապա չկա նաև կառավարության որոշում»: Ավելին, թերթը, վկայակոչելով դեռևս 2007թ. ընդունված «Տավարաբուծության զարգացման ծրագիրը», որը հանգեցրել է... տավարի մսի թանկացմանը, եզրակացնում է, որ նույն բախտն է վիճակված նաև կառավարության վերջին նիստում հաստատված «Ոչխարաբուծության զարգացման հայեցակարգին» («Գառների լռությունը»): Թերթը կասկածում է կառավարության ընդունած մեկ այլ` ԿԸՀ անդամների աշխատավարձը կրկնապատկելու որոշման արդյունավետությանը ևս, և փորձում իր կասկածը փարատել ԿԸՀ նախագահին ուղղված հարցերի պատասխաններով: Իսկ առհասարակ երկրի ամենաբարձր վարձատրվող պետական պաշտոնյաների «թոփ վեցյակի» լուսանկարները տեղադրված են «ՀԺ»-ի առաջին էջում` ՀՀ վերահսկիչ քրեական դատարանի նախագահից մինչև ՀՀ գլխավոր դատախազ:
«Ազգը» հավատարիմ է մնացել իր ստեղծած ավանդույթին և վերլուծել անշարժ գույքի շուկայի վիճակը` էական փոփոխություն չկա: Համեմատաբար զգալի փոփոխություն է արձանագրել «Հայաստանի Հանրապետությունը» հացահատիկի բերքահավաքի արդյունքներով` «Երբ կառավարությունը ժամանակին ձեռք է մեկնում գյուղացուն»:
