չորեքշաբթի, 31 օգոստոսի 2011
Համալիր միջոցառումների անհրաժեշտությունը
«Հայաստանի հանրապետությունը» նշել է, որ գյուղատնտեսությունը տարին կավարտի դրական արդյունքներով, քանի որ, ինչպես թերթի թղթակցի հետ զրույցում շեշտել է Գյուղատնտեսության նախարարի առաջին տեղակալ Սամվել Գալստյանը, տարեսկզբից ոլորտում իրականացված «համալիր միջոցառումները արդյունք են տալիս» (մատչելի վարկերի տրամադրում և դրանց որոշակի մասի սուբսիդավորում կառավարության կողմից, պարարտանյութերի, սերմերի, թունաքիմիկատների և գյուղտեխնիկայի` ԱԱՀ-ից ազատում և այլն): «Հայոց աշխարհի» փոխանցմամբ շաքարավազի թանկացման վերաբերյալ «գործարար Սամվել Ալեքսանյանին պատկանող ընկերություններից» հիմնավորումների մասին տեղեկատվություն պահանջելուց հետո ՏՄՊՊ հանձնաժողովը ուսումնասիրում է կաթնամթերքի շուկան, «որտեղ ևս նկատվում են թանկացման միտումներ»: «Առավոտը» ըստ յուրո ներկայացնելով մայրաքաղաքի թիվ 98 երթուղագիծը շահագործող կազմակերպության և Մալաթիա-Սեբաստիա համայնքի հարկային տեսչության միջև առկա աշխատանքային-ֆինանսական հակասությունները, շտապել է եզրակացնել, թե «բյուջեն լցնելու պատրվակով ՊԵԿ-ը օրը մի.... հնարք է կիրառում», «տնտեսվարողին «անակնկալ» են մատուցել» և «նրա վրա... պարտք դրել» և այլն: «Ժամանակում» վերլուծաբան Ռիչարդ Կիրակոսյանը կարծիք է հայտնել, թե «տնտեսական անկման այս մռայլ իրավիճակում Հայաստանին այլևս չի վայելի տնտեսության երկնիշ աճի... տարիները», նաև նշել, որ «կառավարությունը պետք է գնա ավելի համարձակ բարեփոխումների», ինչպես նաև «արտոնյալ վերնախավի» խնդրի լուծմանը: «Ժամանակը» հայտարարել է, որ երեկ ձերբակալվել է ՀՀ ճանապարհային ոստիկանության պետ Մարգար Օհանյանը, «Երկիրը» այս առիթով հավելել է` «Շոուն սկսված է», «Իրավունք-հետաքննությունը» հարցրել է` «Ո՞ւր կարող են տանել Մարգար Օհանյանի ձերբակալության թելերը», «Առավոտը» թե` «Մի եղբորը ձերբակալեցին, մյուսը` հրաժարական տվեց»:
«Հայկական ժամանակը» հրապարակել է «ՀՀ-ում ամենաբարձր վճարվող պաշտոնյաների» ցանկը: «Ժամանակի» հետ զրույցում ՀՀ տարածքային կառավարման նախարարությանն առընթեր միգրացիոն գործակալության պետ Գագիկ Եգանյանը առաջադրել է հարց, թե «արտագաղթի ահագնացող ծավալների, նոր ալիքի մասին հայտարարողներն ինչի´ հիման վրա են դա ասում»:
«Հրապարակը» Լոռու նախկին մարզպետ Արամ Քոչարյանի հետ զրուցել է վերջինիս աշխատանքից ազատման դրդապատճառների մասին («Ես վարչապետի հետ հակասություն չեմ ունեցել»):
«Հայկական ժամանակը» անդրադարձել է առժամանակ առաջ Երևանի Կորյուն փողոցում գտնվող տների այրման պատմությանը, նաև փոխանցել բնակիչների մտահոգությունները:
