Հայաստանի Հանրապետության Կառավարություն

Այն դրսևորել է «168 ժամը»՝ մտահոգվելով, թե 28-ամյա փոխնախարարը, ով «ՀՀ վարչապետ Տ.Սարգսյանի հիմնադրած «Լույս» հիմնադրամի «երիտասարդ փորձագետներից է», ո՞ւնի արդյոք բավարար աշխատանքային և պրոֆեսիոնալ փորձ։ Եթե ոչ, ապա «փորձանք չդառնա՞»... Ընդհանրապես, այս թերթն հաճախ է մտքի անօրինակ թռիչքներով աչքի ընկնում՝ հատկապես շեշտը դնելով ամեն հայկականի առանձնահատկության վրա։ Այժմ դարձյալ ու կրկին վերհիշելով արտագաղթի թեման, «168 ժամը» այն հարստացնում է նորանոր համեմատություններով։ Նույն թեման է արծարծում «Ազգը»՝ զավեշտալի համարելով այն իրողությունը, որ արտագաղթի մասին «իբր թե մտահոգություն են հայտնում մարդիկ, որոնց իշխանության տարիներին 800 հազարից մինչև 1մլն մարդ է հեռացել երկրից»։ Թերթը նաև որոշ դեղատոմսեր է առաջարկում. «Արտագաղթի դեմ նաև ներգաղթով. այս հնարավորությունը մի տեսակ անտեսվում է»։
Տպագիր մամուլը զարմանալի «իմացություն ու երևակայություն» է ցուցաբերում ՀՀ նախագահի աշխատակազմի ղեկավարի հրաժարականի բոլոր նրբերանգները վեր հանելու և դրանց մի մասը վարչապետի անվան հետ կապելու գործում. «Լքում է քաղաքականությունն ընդմիշտ», «Հանրապետական» խուճապ» («Ժամանակ»), «Միշիկի հերթական զոհը» («ՀԺ»), «Մի ուրվական է շրջում ՀՀԿ-ում» («168 ժամ»), «Հրաժարակա՞ն, թե՞ «ջենտլմենական ձեռքսեղմում» («Առավոտ»), «ՀՀԿ-ում բացատրություն չունեն» («Հրապարակ»), «Ի՞նչ անեն պատգամավորները» («Ժողովուրդ»)։
«Ազգի» կարծիքով «պետք է արագացնել ավանդների փոխհատուցման գործընթացը», «Հրապարակը» համոզված է, որ «ֆիզիկայի ինստիտուտը Երիցյանի բոստանն» է դարձել, «Երկիրը» Արծվիկ Մինասյանի շուրթերով Հայաստանի վերջին վարկանիշը համարում է «լիբերալ և դատարկ», «Իրավունքը» փորձում է հասկանալ, թե ի՞նչ է Գյումրու տեխնոպարկը և ինչքանո՞վ է ռեալ, և թե Հայաստանն իրավունք ո՞ւնի Վրաստանով անցնող մայրուղային գազատարի նկատմամբ, «168 ժամը» նկարագրում է «հայկական բանկերի պերճանքն ու թշվառությունը», «Գոլոս Արմենիին» կոչ է անում արդյունաբերական ձեռնարկությունները չհավասարեցնել խաղատներին, ինչպես նաև օրենսդիր մարմնում քննության առնել սոցիալապես ավելի օգտակար նախագծեր, «Հայոց աշխարհը» նկատում է, որ «բաշխիչ ցանցերն հայտնվել են հարվածի տակ»։