Հայաստանի Հանրապետության Կառավարություն

Իմանալով, որ ՀՀ ԳԽ և ԱԺ բոլոր պատգամավորները հրավիրվում են ՀՀ 20-ամյակի ընդունելությանը և իրենց հրավիրատոմսերը կարող են ստանալ ԱԺ ընդունարանից, ՀԱԿ ներկայացուցիչ Դավիթ Շահնազարյանն իր անունից ՀՀ նախագահին, ԱԺ խոսնակին և վարչապետին հրավիրել է կոնգրեսի կազմակերպած տոնակատարությանը` նույն պայմանով, որ հրավիրատոմսերն ստանան ՀԱԿ գրասենյակից` անձամբ ներկայանալով («ՀԺ»): Մի քանի լուր` իրականության և բամբասանքի սահմանագծից. ՀՀ վարչապետն է ղեկավարելու ՀՀԿ նախընտրական շտաբը («Իրավունք», «Դե ֆակտո իրատես»), Տիգրան Սարգսյանը բանաստեղծ Հովհ.Գրիգորյանի բուժման համար տրամադրել է 1մլն դրամ, բայց չգիտես ինչու գումարը որոշել է փոխանցել «փուլերով» («Ժողովուրդ»), Սյունիքի մարզպետը, ի խախտումն վարչապետի որոշման, Երևանում ավտոմեքենա է վարում առանց ամրագոտին կապելու. նրան թվացել է, թե ինքը «Սյունաց լեռներում է» («Առավոտ»):
Մամուլը մեծ տեղ է հատկացնում կառավարության երեկվա նիստի և կառավարության շենքի մոտ նախարարների և քաղաքացիների հանդիպման լուսաբանմանը. «Աղետի գոտում բնակարան ստանալու փաստաթղթերի ներկայացման վերջնաժամկետը նոյեմբերին 1-ն է» («Ազգ»), «Աղետի գոտու հարցը` լուծված», «Իսկ ո՞վ է քանդողը» («Երկիր»), «Կառավարության նիստ` մշտական բողոքների ուղեկցությամբ» («Հայաստանի զրուցակից»), «Նախարարներին «հարցախեղդ» արեցին» («Ժողովուրդ»), «Կրպակներից մինչև կոռուպցիա», «Սեյրան Օհանյանը հուզվե՞լ էր» («Հրապարակ»):
«Արթիկում «հեղափոխական իրավիճակ է», «Առավոտի» փոխանցմամբ հայտարարում է բոլշևիկյան տերմինաբանությունը չմոռացած հայկոմկուսի առաջին քարտուղարը, «Ժողովուրդը» վարչապետից է փորձում պարզել, թե ինչ լծակներ են պետք, որ պայքարի «օլիգոմոնոպոլիաների դեմ» և կանխի արտագաղթը, բայց չի հաջողում. ստիպված շարադրում է իր իմացածը և նյութը վերնագրում «Արտագաղթով` դեպի անկախություն»:
Որոշ լրատվամիջոցներ մտահոգված են, որ ֆինանսատնտեսական ճգնաժամը կարող է կրկնվել. թեման արծարծել էն «Հայոց աշխարհը» («Հայաստանի տնտեսությունը շարունակում է խոցելի լինել»), «Դե ֆակտո իրատեսը» («Միջազգային ֆինանսական ճգնաժամի ազդեցությունը Հայաստանի տնտեսության վրա»), «Դելովոյ էքսպրեսը» («Հունական ողբերգության դասերը»), «Իրավունքը» («Նոր ճգնաժամի ուրվականը սկսում է աչքի առաջ նյութականանալ»):