շաբաթ, 17 սեպտեմբերի 2011
«Իսկ դու տոլմա սիրո՞ւմ ես...»
«Ժողովրդի» տեղեկացմամբ «Վրաստանի իշխանությունները, որպես ազգային ապրանքանիշ, պատենտավորել են ավելի քան տասը անուն մթերք, որոնց թվում են խաչապուրին, մածունը և ընկույզով սուջուխը», իսկ մերոնք` վարչապետն ու էկոնոմիկայի նախկին նախարարը, «ժամանակին չմտածեցին հայկական բաստուրման, կոնյակը, լավաշը, տոլման և այլ ապրանքատեսակները պատենտավորելու մասին»: Պատճառն այն է, որ վրացիները ոչ մի հարցում իրենց չեն կաշկանդում հայ-վրացական առանց այն էլ խնդրահարույց հարաբերություններում նոր խնդիրներ չստեղծելու մտածողությամբ: «Նովոյե վրեմյան» իր հերթին նկատում է, որ մեր հանրության մեջ տիրապետողն այն կարծիքն է, թե իբր հարևան երկրներից տնտեսական ամենավատ պայմաններն ունի Հայաստանը: Մինչդեռ դա ճիշտ չէ. թերթը համեմատում է Հարավային Կովկասի երեք երկրների տնտեսական ցուցանիշները և ապացուցում իր վարկածը: «168 ժամն» էլ է զբաղվում համեմատական վերլուծությամբ, սակայն ՏՏ ոլորտի, և ուշադրություն հրավիրում այն հանգամանքի վրա, որ ինտերնետի թանկությամբ Հայաստանն ԱՊՀ երկրների թվում 10-րդն է` «Դժվարամատչելիության տարածաշրջանային կենտրոն»: «Ազգը» դրվատում է արտահանումը խթանալու և ցորենի անհրաժեշտ պաշար կուտակելու ուղղությամբ կառավարության ձեռնարկած ջանքերը և իր հերթին դրանց նպաստող առաջարկներ անում: «Երկիրը» «լսել է», որ իբր կառավարությունը քննարկում է Որոտանի ՀԷԿ-երի համակարգը Ռուսաստանին փոխանցելու հարցը, ինչին ի պատասխան նախարար Արմեն Մովսիսյանն ասել է. «Ոչ մի նման գործընթաց չկա»: Տարածաշրջանային համագործակցության թեման յուրովի ամփոփում է ՀՀ երկրորդ նախագահը` «Գոլոս Արմենիի» էջերում արտահայտելով իր աներկբա համոզմունքը` «Մեր զարգացման տեմպերը պետք է ավելի բարձր լինեն, քան տարածաշրջանի երկրներինը»:
ՀՀ վարչապետին բողոքի դիմում է հղել կրպակատեր Անահիտ Գրիգորյանը («ՀԺ»), իսկ «Առավոտի» տվյալով Շիրակի մարզում ՌԴ-ից ներկրած էլիտար սերմնացուն հատկացվում է միայն «էլիտային»:
«Հայոց աշխարհն» արձանագրում է Հայաստանի տնտեսության մեջ օտարերկրյա ներդրումների աճը, բայց ափսոսում, որ դա եղել է «մեկ-երկու ճյուղի հաշվին»: Մինչ այդ թերթը հարցազրույց է արել Արծվիկ Մինասյանի հետ. վերջինս կանխատեսում է, որ նոր ճգնաժամի դեպքում կառավարության ոչ արդյունավետ քաղաքականության հետևանքով «մեր պետության քաղաքացու կենսամակարդակն է դարձյալ անկում ունենալու, մեր տնտեսությունն է դառնալու էլ ավելի անմրցունակ»: Կուսակցական-տնտեսական հարցեր է քննարկում «168 ժամը»` հարցազրույցի հրավիրելով ՀՀԿ փոխնախագահ Ռազմիկ Զոհրաբյանին: «ՀԺ» շարունակում է իր «լեզվակռիվը» ՊԵԿ հետ` մնալով այն համոզմանը, թե «խոշոր հարկատուների վճարած հարկերը անցած տարվա համեմատ չեն աճել»:
