ուրբաթ, 23 սեպտեմբերի 2011
Հայաստանը ճգնաժամից առաջ և հիմա
Ալեքսանդր Իսկանդարյանի կարծիքով Հայաստանը ճգնաժամից առաջ «երրորդ աշխարհի բավականաչափ բուռն զարգացող երկրներից էր, իսկ այժմ այն երրորդ աշխարհի երկիր է, որը լճացման փուլում է» («Դելովոյ էքսպրես»): Այնուհետև քաղաքագետը նշում է այն միջոցները, որոնց կիրառմամբ իշխանությունը կարող է իրավիճակի դրական փոփոխության հասնել: Իսկ ահա Բագրատ Ասատրյանի աչքին «կառավարությունը հոգնածի տեսք ունի» («Երկիր»), սոցիալական բևեռացումն էլ «ամենաբարձր մակարդակում է»: Ընդհանրապես երեկվա նիստը և վարչապետի հնչեցրած գնահատականները մեծ արձագանք են գտել մամուլում. «Հայաստանին տրված տնտեսական ինդեքսները բարձրանում են» («Ազգ»), «Տոնական հաշվետվություն, կամ սայլապանս կառապանիդ վնաս չէ...», «Կերակրվեք ներմուծած լավատեսությամբ» («Հրապարակ»), «Իսկ դու կովը կթե՞լ ես» («ՀԺ»), «Լավատեսությունը լճացման համապատկերում» («Դելովոյ էքսպրես»), «Ցինիզմ և մեծ խաբեություն» («Ժողովուրդ»), «Սպասվում է տնտեսական ակտիվության նվազում» («Հայոց աշխարհ»), «Երբ մի ձեռքը տեղյակ չէ, թե ինչ է անում մյուսը» («Իրավունք»): Նույնիսկ սերմնացուի ներկրումը երբեմն միատեսակ չի ընկալվում. «Ցորենի ցանքատարածությունները գնալով նվազում են» («Իրավունք»), «էլիտար` քչերին» («Ժողովուրդ»): Այս թերթը լուսանկարային ռեպորտաժով է արձագանքել կառավարության շենքի առջև խմբված մարդկանց և նախարարների շփմանը:
«ՀԺ»-ն ատոմակայանի ավելի քան 150 աշխատակիցների` աշխատանքից ազատվելու դիմում գրելու փաստը «նախաճգնաժամ» է համարում և զրուցում է ՀԱԷԿ տնօրենի հետ: «Դելովոյ էքսպրեսը» զգուշացնում է, որ ռուս-հայկական ապրանքաշրջանառությունը կարող է նվազել երկաթուղային փոխադրման ոլորտում առաջացած բարդությունների պատճառով («Սմաթը» կգնա Թուրքիա»), «Հայաստանի զրուցակիցն» էլ հարցնում է, թե «Կառավարությունն ինչո՞ւ է գիտաշխատողներին անտեսում ու շրջանցում»:
