Հայաստանի Հանրապետության Կառավարություն

Երեկվա կառավարության նիստից առաջ ԱՊՀ երկրների միջև ազատ առևտրի գոտու ստեղծման համաձայնագրի ստորագրման վերաբերյալ ՀՀ վարչապետ Տիգրան Սարգսյանի ծավալուն մեկնաբանությանն անդրադառնալով, «Ազգը» միջպետական փաստաթուղթը որակել է տնտեսության զարգացման նոր հնարավորություն, որը թույլ է տալիս «600-ով նվազեցնել» նախկինում գոյություն ունեցող սահմանափակումները: Թեմային արձագանքել են «Հրապարակը» («Համարձակ պտույտներ Արևմուտքի և Ռուսաստանի միջև») և «Հայացքը», որ, թվում է իմիջիալյոց, հարցրել է, թե արդյոք «Եվրամիությունը չի՞ դժգոհի ազատ գոտու ստեղծման համաձայնագրից»: «Հայաստանի հանրապետությունը» վկայակոչելով միջազգային ֆինանսական կորպորացիայի և ՀԲ օրերս հրապարակած «Գործարարությամբ զբաղվելը 2012թ. գործարարությունն ավելի թափանցիկ աշխարհում» զեկույցի` Հայաստանի տնտեսության ոլորտում կատարված բարեփոխումները, նշել է, որ դրանք «ամենաշատ... իրականացրել է Հայաստանը» («5 ոլորտներում», և «այդ առումով միակը` 183 երկրների մեջ»), և ըստ էության «Doing Business-2012»-ի ցուցանիշները ոչ այլ ինչ են, քան ներկա իրավիճակի արտացոլումը»: Թեմային արձագանքելով «Ազգը» նշել է, որ «Հայաստանը 6 քայլով առաջ է շարժվել և... տեղափոխվել է 55-րդ տեղը», մի այլ հրապարակման մեջ հավելելով նաև, որ սեպտեմբեր ամսին, ըստ ԱՎԾ հրապարակած ցուցանիշների, երկրի տնտեսական ակտիվության աճը կազմել է 9 տոկոս»: «Երկրում» իր տեսակետն է հայտնել նաև ՀՀ նախկին վարչապետ Հրանտ Բագրատյանը, ով թեև ընդունել է «6 աստիճանով բարելավումը», սակայն շարունակել է իրեն հատուկ դժգոհությունները, թե «դա չի կարող մեզ բավարարել», «... լրիվ վատացել են», «էլ վատանալու տեղ չկար»: Եվ այլն: Մի այլ հրապարակման մեջ թերթը քաղաքացիական ծառայողների աշխատավարձերի բարձրացման հիմնախնդիրը համարել է «պետական կառավարման աքիլլեսյան գարշապարը»:
Ըստ «Հայոց աշխարհի» էներգետիկայի համակարգում «կարծես սկանդալ է հասունանում», քանի որ մի կողմից ատոմակայանի 158 աշխատողներ պահանջում են աշխատավարձի բարձրացում, մյուս կողմից... «հարկայինը խուզարկություններ է սկսել «Հայաստանի բաշխիչ էլեկտրացանցեր» ընկերությունում, պատճառաբանելով, թե վերջինս չի կատարել իր հարկային պարտավորությունները: Ատոմակայանի աշխատակիցների դժգոհությանն անդրադարձել է նաև «Ժամանակը» («Ատոմակայանի աշխատակիցների համար փող չկա»):
Ըստ «Երկրի» «չնայած կառավարությունը «մեծ-մեծ խոսում է այս տարվա բերքի «100 տոկոսանոց» իրացումից», այդուհանդերձ գյուղացին գոհ չէ, իսկ «բերքը մթերվել է գրեթե ինքնարժեքով»: Գյուղոլորտին անդրադարձել է նաև «Իրավունքը»` ներկայացնելով սեփական մեկնությունները 2012թ. ՀՀ պետական բյուջեի նախագծով գյուղատնտեսության նախարարությանը տրամադրվող միջոցների վերաբերյալ. «300 միլիոնանոց գյուղատնտեսական խորհրդատվություն»: «Հայացքի» և «Երկրի» հրապարակումները («Շինաշխատանքները չեն խանգարում Թռչկանի ջրվեժի բնականոն գործունեությանը» և «Վարչապետը մտահոգված է Թռչկանի ճակատագրով») ներկայացնում են Լոռու մարզում գտնվող ջրվեժի շուրջ ծավալվող իրադարձությունները. «Ժամանակը» իր հանգույն «նոր մանրամասներ» է հաղորդել «Նաիրիտում» ֆիննախի բացահայտած խախտումներից»: