Հայաստանի Հանրապետության Կառավարություն

Սանկտ Պետերբուրգում ՀՀ վարչապետ Տիգրան Սարգսյանի կողմից ստորագրված ԱՊՀ ազատ առևտրի գոտու մասին պայմանագրի շուրջ տարատեսակ մեկնաբանությունները շարունակվում են: «Հրապարակը» մի կողմից եղելությունը գնահատել է իրադարձային, մյուս կողմից, քանի որ «պարոն Բագրատյանին կապվելու... փորձերն ապարդյուն» են եղել, սեփական նախաձեռնությամբ քրքրել է արխիվները, փորձել պարզել, թե ինչու, թերթի փոխանցմամբ, «ժամանակին մերժված փաստաթուղթը... ընդունվեց», հրապարակումն էլ խորագրել «տնտեսական խճանկար կամ վալինկեքը հայկական լեռնաշխարհում»: «Հայացքի» «փորձերը ապարդյուն» չեն անցել. պարբերականի հետ զրույցում Հրանտ Բագրատյանը մեկնաբանել է, թե ժամանակին` «1994 թվականին ստորագրված պայմանագիրը մեղմ էր և ուղղված չէր երրորդ երկրների դեմ», թեև խոստովանել է նաև, որ այսօրվա պայմանագրի վերաբերյալ մեկնաբանություններ չի կարող անել` տեքստին ծանոթ չլինելու պատճառով:
«168 ժամը», թող որ երկու օր ուշացումով, լուսաբանել է ՀԲ Doing Business 2012 զեկույցի` Հայաստանի տնտեսության վիճակի և «Բիզնեսով զբաղվելու դյուրինության վերաբերյալ» հատվածը և նշել երկու եզրակացություն. «վեց քայլ առաջ ու շատ քայլեր հետ», և թե «պետք չէ Doing Business»-ի դերը գնահատել ու բարեփոխումներ իրականացնել առաջին հերթին այդտեղ մի քանի հորիզոնականով բարձրանալու համար»... Եվ այլն:
«Հայկական ժամանակը» վերստին և նորեն անդրադարձել է գալիք տարվա պետբյուջեի նախագծով նախատեսված լրացուցիչ հարկային հավաքագրումների հիմնահարցին, «Ժամանակը» հավելել է, թե իբր հանձինս «հարկային եկամուտների ծավալի 101 միլիարդով ավելացման», որ նախատեսված է 2012թ. պետական բյուջեի նախագծով, «Հայաստանի տնտեսության ոլորտում իսկապես հասունանում է մի մեծ ցունամի»: «Խաղ կրակի հետ». գրել է «Ժողովուրդը» նշելով, որ «Մեծամորի ատոմակայանի տնօրինությունը պաշտոնապես մերժել է բարձրացնել» բողոքավոր աշխատակիցների աշխատավարձը, և «նրանք կհեռանան աշխատանքից»: Տևական ժամանակ կազմակերպությունում տիրող իրավիճակի երեկվա հանգուցալուծումը յուրօրինակ գնահատականների է արժանացել նաև այլ լրատվամիջոցների էջերում. «Ատոմակայանը երշիկի արտադրամաս չէ» («Առավոտ»), «Նախարարը հորդորեց ազատել աշխատակիցներին» («Հրապարակ»), «Ատոմակայանի սոցիալական ռեակցիան» («Հայոց աշխարհ»), «ԱԷԿ-ի 1800 աշխատակիցներ կմիանան 158 գործազուրկներին» («Ժամանակ»), «Ովքեր են իրականում փակում ՀԱԷԿ-ը» («168 ժամ») և այլն: Անդրադառնալով երեկվա ՀՀԿ աշխատանքային խորհրդակցությանը, «Ժողովուրդը», նկատի ունենալով շաբաթվա ընթացքում լրատվամիջոցների էջերում շրջանառվող ՀՀԿ-ԲՀԿ քաղաքական և միջկուսակցական փոխհարաբերությունների թեման, գրել է. «Այս ռաունդն ավարտվեց ԲՀԿ-ի հաղթանակով»: «Ժամանակը» հավելել է, թե իբր ՀՀԿ-ն... «փորձում է հնարավորինս սքողել ԲՀԿ հետ ունեցած տարաձայնությունները»: «168 ժամը» բարձրաձայնել է թերևս իրեն անչափ հետաքրքրող հարցը` «Ո՞վ է ուզում քանդել կոալիցիան»: «Հայաստանի Հանրապետությունը» վկայակոչել է Էկոնոմիկայի նախարարի տեղակալ Արա Պետրոսյանի երեկվա հայտարարությունը, որ այս տարի «Հայաստան այցելած զբոսաշրջիկների թիվը կանցնի 800 հազարից» և որ «զբոսաշրջային արդյունքի համակցումը հարևանների հետ մեր երկրի զբոսաշրջության ապագան է»: «Հայոց աշխարհը» (նաև «Հայացքը») անդրադարձել է զբոսաշրջության հիմնահարցերին, մասնավորապես ապօրինի դրամահավաքի դեպքերին ու հարցրել` «Էլ որ զբոսաշրջիկը կգա Հայաստան»: